VIQUEQUE, 09 fevereiru 2022 (TATOLI)–Organizasaun Naun Govermentál (ONG) Knua Haberan Komunidade (KHK) no komunidade hosi suku Uma-Quic, postu administrative Viqueque villa, munisípiu Viqueque, kuda ai-oan hamutuk 1.000 iha mota ninin Uac.
“Liuhosi atividade kuda ai-oan, ita bele proteje risku dezastre naturál iha suku Uma-Quic, tanba fatin ne’e risku ba dezastre naturál. Tanba ne’e, ha’u husu ba komunidade atu kuidadu ai-oan sira ne’ebé kuda ona iha mota ninin, nune’e bele proteje bee no satán rai halai,” Xefe suku Uma-Quic, Hermigildo Rangel, hateten ba Agência TATOLI, iha área hala’o atividade, kuarta ne’e.
Notísia relevante: MAP Viqueque sei kuda ai-kameli oan 566.000 iha suku Uma-uain kraik
Aleinde ne’e, iha komunidade barak maka hela besik mota ninin, tanba ne’e atividade ne’e atu satán bee-mota labele estraga uma sira.
“Ami hetan apoiu varidade ai-oan hanesan ai-matan dukur, sukaer, ai-nitas, kaijo no ai-mahoini hosi Ministériu Agrikultura no Peska (MAP) Viqueque hamutuk 1.000,” nia akresenta.
Iha fatin hanesan, Diretór KHK, Agosto Pinto, hateten, komunidade presiza projete-an hosi risku dezastre naturál.
“La’ós ita hein de’it parte Governu maka mai halo hotu, maibé ita proteje uluk lai maka husu tan ba Governu,” nia enkoraja.
Atividade ne’e partisipa hosi komunidade lokál, estudante Calixa, Komadante Bombeiru no tékniku Floresta munisípiu Viqueque
Jornalista : Vitorino Lopes da Costa
Editora : Julia Chatarina
