COVALIMA, 29 marsu 2022 (TATOLI)– Diretór Servisu Munisípal Agrikultura Covalima Domingos Gusmão, informa durante udan iha marsu tinan ne’e, estragu natar no toos kuaze ektare 40, iha suku Raimea Oebaba, Postu Administrativu Zumalai.
“Durante udan iha fulan marsu, bazea ba relatóriu ne’ebé mak estensionista aprezenta mai ha’u, estraga natar no toos kuaze ektare 40, iha suku Raimea Oebaba, Postu Administrarivu Zumalai” Diretór Agrikultura Covalima, Domingos Gusmão, ba Tatoli, iha salaun Administrasaun Kampung-baru, ohin.
Domingos dehan, natar no toos komunidade nian hetan estragu tanba kauza hosi udan-bo’ot ne’ebé halo volume bee mota makaas hodi sobu natar no toos komunidade sira ni’an.
Maibé la’os estraga natar no toos iha Postu Administrativu Zumalai de’it, maibé iha Postu Administrativu Suai, suku Suai loro estraga mós irigasaun ne´ebé fornese bee ba natar no rezulta raihenek taka bee dalan halo bee intupidu nune’e halo agrikultór sira preokupa.
“Ha’u hakarak dehan la’os iha zumalai de’it, maibé parte Suai vila kanál irigasaun raihenek taka bee dalan halo bee intupidu iha Suku Suai Loro maibé dezastre naturál ita labele satan”, nia dehan.
Aleinde estraga toos no natar estraga mós plantasaun kafee no kami iha Postu Administrativu Fatululik ne’ebé identifika liuhosi delegasaun territoriál florestál.
Hatan ba asuntu hirak ne´e, diretór agrikultura kontatu ona ba Institu Jestaun Ekipamentu (IGE-Sigla Portugés) hodi halo normalizasaun, maibé to’o agora seidauk.
“Ha’u halo esforsu hodi koordena ho administradór munisípiu, diretora IGE iha nasionál no Ministru Agrikultura no Peskas hodi buka soluasaun”, katak.
Jornalista : Celestina Teles
Editór : Zezito Silva
