DILI,13 abril 2022 (TATOLI)— Empreza Telekomcel entrega mákina fumigasaun unidade rua ba Ministériu Saúde (MS) hodi haforsa asisténsia ba kombate moras dengue iha Timor-Leste.
“Ita fó apoia mákina fumigasaun ba Ministériu Saúde ne’ebé espera ida ne’e bele fasilita Governu hodi kombate moras dengue iha Timor-Leste,” Vise Prezidente Telkomcel ba asuntu komersializasaun no Venda, Heru Yulianto hateten ba jornalista sira iha Pálasiu Sinzas-Dili, Caicoli ohin.
Empreza Telkomcel iha programa ida naran Telkomcel Care no Interese, nune’e apoia mákina fogging no antes ne’e apoia ona mákina ventiladór ba pasiente COVID-19 no apoia ona ambulánsia.
Vise Prezidente ne’e dehan sei kontinua apoia Ministériu Saúde atu kombate Surtu dengue no COVID-19 iha Timor-Leste.
Iha biban hanesan, Minsitru Saúde, Bonifacio “Maucoli” dos Reis,lori Governu nia naran agradese no apresia CEO Kompañia Telkomcel, ne’ebé ho laran luak apoiu Ministériu Saúde ho liuhosi fornese mákina fogging.
“Imi-nia apoia bele ajuda Ministériu Saúde hodi haforsa asisténsia no kombate moras surtu dengue iha Timor-Leste,” Governante ne’e akresenta.
Alende apoiu Mákina Fogging, Kompania Telkomcel mós apoia ona ambulánsia ida no Ekipamentu Médikus durante Pandemia COVID-19.
“Hakarak mós solisita ba pesoál Ministériu Saúde (Servisu Sentrál no Munisípiu) ne’ebé simu no operasionaliza mákina Fogging doasaun ne’e atu utiliza ho responsabilidade no halo manutensaun ho didiak, nune’e bele fó benefisiu ba komunidade liuhusi atividade fumigasaun fatin sira hotu ne’ebé iha risku ba susuk moris fatin,” nia sujere.
Ministériu Saúde bolu nafatin atensaun ba komunidade hotu atu halo prevensaun ba Moras Dengue iha Timor-Leste tanba hotu-hotu kontribuisaun maka bele redús no halakon dengue no moras seluk tan.
Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú fulan-janeiru to’o horiseik pasiente dengue sa’e ba 4.148 hosi númeru ne’e na’in 50 mak mate.
Maioria kazu ne’e deteta husi Munisípiu Dili ho totál 2.782, Baucau 251, Manatuto 172, Covalima 135, Ermera 118, Manufahi 167, Viqueque 69, Ainaro 45, Liquiça 112, Aileu 87, Bobonaro 52, Lautem 153 no RAEOA lima.
Notísia relevante: Surtu dengue: pasiente sa’e ba 4.174 no mate nain-50
Jornalista : Felicidade Ximenes
Editór : Florencio Miranda Ximenes
