DILI, 02 maiu 2022 (TATOLI) – Sekretária Estadu Kooperativa (SECoop, sigla portugés), inagura Sede Kooperativa Kréditu Bieky Sahe (CCBS, sigla portugés) iha sábadu,30/04, iha Suku Ostico, Postu Administrativu Vemase, Munisípiu Baucau.
Iha inagurasaun ne’e SEKoop husu ba estrutura no membru sira CCBS atu servisu makas, hodi mobiliza komunidade sira envole aan iha CCBS tanba kooperativa kréditu ne’e ninia baze maka membru.
“Hau hakrak fó parabens ba ita boot sira, maske osan kiik maibé ninia rejultadu di´ak. Uma ne’e sai dignidade ba instituisaun ida nian, kuandu iha ona uma di´ak, ema dehan kooperativa iha ona ninia dignidade, entaun ninia servisu tenke di´ak liutan, aumenta imi-nia dezenpeñu servisu”, Sekretáriu Estadu Kooperativa, Elizário Ferreira, liuhosi komunikadu imprensa ne’ebé Agência Tatoli asesu, segunda ne’e.
Nia husu ba membru CCBS sira atu servisu makaas, tanba haree hosi membru CCBS nian foin ema na’in 109, ne´e nota katak seidauk to’o pusentu ida hosi populsaun Ostico ninian, nune’e kooperativa CCBS tenke nakloke aan servisu makaas oinsá mak bele akumula tan populasaun hosi suku viziñu sira hanesan, Loilubo, Uatulari, no Osowala.
Governante ne’e mós louva relatóriu husi cooperativa sira nian no moos kontinua husu ba estrutura kooperativa atu servisu makas hodi dezenvolve poupansa no kréditu sira.
Iha fatin hanesan, Prezidente CCBS, Afonso da Costa Freitas, sente kontente tanba iha ona mahon ida bele halibur membru sira.
“Ami nu’udar membru sente kontente tebes tanba edifísiu iha ona, no ba oin ami sei servisu makas hodi aumenta membru kooperativa nian, tanba kooperativa kréditu ninia forsa maka mai hosi membru sira, tantu husi suku viziñu sira, postu administrativu sira seluk no mós munisípiu sira, kooperativa kréditu Bieky Sahe sempre nakloke aan ba ema hotu atu involve”, dehan nia.
Totál gastu ba harii edifísiu CCBS nian hamutuk $ 11.222,05, apóiu ne´e mai hosi koperativa rasik.
CCBS harii iha loron 30 fulan outubro 2016 ho membru inisiál 20, kada membru hatama osan hamutuk $65, kompostu hosi, $50 ba kapitál, $5 ba obrigatóiru, no $10 ba administrasaun, no agora iha ninia membru hamutuk ema na’in 109, ho kapitál $48.000.
Jornalista: Arminda Fonseca
Editór : Zezito Silva
