VIQUEQUE, 13 jullu 2022 (TATOLI)–Ministériu Administrasaun Estatál (MAE) liuhosi Diresaun Jerál Dezenvolvimentu Rurál, kuarta ne’e, halo sosializasaun kona-ba diploma ministeriál no matadalan implementasaun programa Mão-de-Obra ba postu administrativu (PEMOPA) ba autoridade sira iha munisípiu Viqueque.
“Ohin ami halo sosializasaun kona-ba diploma ministeriál no matadalan programa Mão-de-Obra postu administrativu iha munisípiu Viqueque tanba iha tinan kotuk programa ne’e implementa ona. Iha tinan ida-ne’e, VIII Governu Kontituisionál kontinua tau orsamentu ba programa ne’e no ita halo revizaun oituan ba diploma ministeriál no matadalan implementasaun. Tanba ne’e ami mai halo sosializasaun ba alterasaun kuadru legál sira hanesan administradór, diretór munisípiu no xefe suku sira bele kumpreende,” Reprezentante Diretór Jerál Dezenvolvimentu Rurál, Egas José Caetano, hateten ba Agência Tatoli, iha salaun administrasaun munisipál, kuarta ne’e.
Notísia relevante: 10 setembru, PIDM konstrui jardín 59 Viqueque
Atuál Xefe Departamentu Nasionál Planu Integradu Munisipál (PIDM) MAE ne’e dehan, programa PMOPA sei implementa iha postu administrativu lima iha munisípiu Viqueque no iha suku 36 liuhosi sosializasaun hodi autoridade sira bele kumpreende, nune’e iha implementasaun programa labele mosu fallansu ruma.
“Implementasaun PMOPA kada postu ida sei hetan orsamentu $100.000, ne’ebé 5% utiliza ba operasionál no orsamentu 95% ita sei utiliza ba rekrutamentu traballadór no sosa ekipamentu. Durasaun ba atividade PMOP sei depende ba atividade ne’ebé trasa ona iha suku no administrativu,” nia akresenta.
Traballadór sira ne’ebé hala’o serbisu iha PMOPA ho kategoria semanál, signifika kada semana rekruta traballadór na’in-20 no na’in-ida sai xefe, nune’e ekipa kada semana halo rotasaun serbisu hodi fó tempu ba traballadór seluk hala’o serbisu no hetan osan hosi PMOPA atu hadi’a sira-nia ekonomia iha uma-laran.
Iha fatin hanesan, Administradór munisípiu Viqueque, Januário Soares ‘Bolly’, hateten, PMOPA iha faze ne’e implementa ba daruak ona, ne’ebé iha implementasaun dahuluk iha tinan 2021 komunidade hala’o serbisu iha suku hodi kontribui ba ambiente seguru, reziliente no seguru.
“Programa ne’e ita implementa uluk ona iha tinan 2021 no tinan ne’e ita kontinua implementa liuhosi orsamentu ratifikativu. Orsamentu ida-ne’e atu responde ba nesesidade postu administrativu sira hodi hadi’a kondiasaun iha postu administrativu no benefisia ba komunidade nia ekonomia tanba Governu kria kampu traballu ida ba ita-nia komunidade hodi hetan osan hosi atividade ne’e,” Autoridade munisípiu ne’e hato’o.
Nune’e, implementasaun programa PMOP sei la’o tuir matadan ho sistema rotativu ba implementasaun PMOPA hodi komunidade bele hetan benefísiu.
Atividade sosializasaun ne’e hetan partisipa hosi Administradór postu, xefe suku, funsionáriu Programa Nasioál Dezenvolvimentu Suku (PNDS) no funisionáriu PIDM munisípiu Viqueque.
Jornalista : Vitorino Lopes da Costa
Editora : Julia Chatarina
