DILI, 14 jullu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten durante iha debate ‘Estado do Pais’ ne’ebé PN hala’o ho Xefe Governu, Taur Matan Ruak, hatudu iha pasu pozitivu atu bele muda ka re-define medida estratéjiku hodi hasoru konjuntura atuál nasaun nian.
Notísia Relevante: VIII Governu lideradu PM Taur konsege ultrapasa dezafiu oioin
“Rekuñese ba situasaun hanesan ne’e pozitivu atu bele muda medida solusaun ho atensaun foka ba ema nu’udar sentru no fatór dinamizadór iha dezenvolvimentu setór hotu-hotu,” Prezidente PN, Anicento Guterres Lopes, hato’o iha reuniaun plenária extraordináriu durante debate ho Xefe Governu iha Parlamentu Nasionál, kinta ne’e.
Kestaun importante ne’ebé sai xave ba intervensaun durante debate ne’e, liga intervensaun hotu-hotu kona-ba governasaun no dezenvolvimentu mak ema ho nia meiu ambiente ne’ebé sustenta ema-nia moris, sidadaun sira-nia kualidade moris no nia kompeténsia tomak.
Notísia Relevante: Bankada opozisaun husu Governu dezenvolve setór produtivu
Aniceto Guterres halo rezumu badak iha pontu importante tolu (3) hosi debate ne’e mak hanesan dahuluk governasaun no dezenvolvimentu iha tinan haat (4) nia laran la’o ho todan no difikuldade barak no hasoru resesaun ekonomika iha rai-laran.
Daruak, iha tinan 2020 ba oin Timor-Leste resolve ona krize relasionamentu instituisionál no hatuur hikas funsionamentu regulár órgaun Estadu nian no fó biban ba Governu hodi foti medida lubun ida-ne’ebé durante debate Xefe Governu nia aprezentasaun no membru Governu sira-nia afirmasaun no konfirma mós hosi deputadu balun.
Datoluk, Governu rasik mós rekuñese frakeza no dezáfiu ne’ebé seidauk konsege rezolve tanba problema Estadu nian no dezáfiu iha dezenvolvimentu la ramata ho Governu ida-nia governasaun de’it, falla inkonsisténsia ka inkapasidade hosi governasaun Governu ida-nian fó impaktu ba Governu ida tuir mai nia governasaun, no situasaun hanesan akontese hosi Governu anteriór sira.
Nia mós observa sei iha intervensaun sira-ne’ebé ignora frakeza no atribui kulpa ba parte seluk no kestaun esensiál ida ne’e mak seida’uk hetan atensaun másima ne’ebé debate ho PM iha tinan sira tuir mai ita bele foku mós ba kapitál umanu no kapitál naturál sai nu’udar temátika ba debate.
“Nune’e meza promete kontinua aborda kestaun sira-ne’ebé ohin koloka iha debate ida-ne’e ba kada área ninian no iha kinta lejislativa sesaun ne’ebé sei hahú iha 15 setembru,” nia dehan.
Nia mós rekuñese debate liga ba tema ne’ebé iha, durante intervensaun deputadu sira-nia balun la foku nune’e tempu tuir sei hadi’a mekanizmu hodi bele halo balansu kle’an liután.
“Ita tenke rekuñese katak tema ida-ne’e fó ba ita atu haree asuntu barak maske ita lakon foku kestaun xave ka sentrál iha tinan hirak ne’e nia laran, nu’udar pasu ida ba dahaluk tolera mekanizmu ida-ne’e no tuir kada tinan sei kontinua ho tema sentrál ida ka rua hodi bele halo balansu kle’an liután,” nia hateten.
Prezidente PN ne’e agradese ba disponibilidade Xefe Governu ho membru Governu tomak no deputadu sira-nia intervensaun, observasaun krítiku no konfirmasaun ho faktu kona-ba progresu ne’ebé ita-nia Estadu atinje ona to’o agora.
Notísia Relevante: Governu rekorre empréstimu konsensionál hosi parseiru dezenvolvimentu millaun $731,5
Jornalista : Nelson de Sousa
Editór : Cancio Ximenes
