BOBONARO, 22 jullu 2022 (TATOLI) – Komandu Polísia Nasionál Timor-Leste, Unidade Ema Vulneravél (VPU) Munisípiu Bobonaro iha ona edifísiu própriu. Edifísiu ne’e lokaliza iha suku Holsa, postu administrativu Maliana, munisípiu Bobonaro.
Nune’e sesta ne’e, Vise-Ministru Interior António Armindo, Sekretária Estadu Igualdade no Inkluzaun (SEII), Maria do Rosário Fátima Correia, hamutuk ho Programa Dezenvolvimentu Nasaun Unida (UNDP, sigla inglés) inaugura ona edifísiu refere. Obra ne’e mós hetan bensaun hosi Padre Pároku Maliana, Valerio Gusmão.
Notísia relevante: UE apoiu rihun $6 fó formasaun sensível ba asuntu VHFLF ba Polísia VPU
Obra ne’e nudar inisiativa hosi programa Espost Light no hetan doasaun orsamentu hosi Uniaun Europeia liuhosi UNDP ho montante $62,550.55 ne’ebé nia konstrusaun hahú iha loron 08/11/2021 no finaliza finaliza iha loron 13/05/2022.
Projetu ne’e responsabiliza hosi empreza Ravio Construction Unipesoál Lda ho totál kuartu haat kompletu ho hariis-fatin, fasilidade sira seluk inklui asesiblidade ba ema ho defisiénsia.
Vise Ministru Interior, António Armindo, agradese ba parseiru sira no rekoñese apoia hirak ne’ebé Uniaun Europeoa no UNDP oferese ba governu hanesan kontinuasaun ba apoia sira- ne’ebé antes ne’e iha ona.
“Uma ida-ne’e simples, maibé uma ida-ne’ebé iha nia signifikante, atu haree reprezenta munisípiu hodi tau matan ba ita-nia sobrevivente sira-ne’ebé mak hasoru krime violénsia oinoin,” nia hateten.
Biban ne’e, Sekretária Estadu Igualdade no Inkluzaun, Maria do Rosário Fátima Correia, agradese ba Uniaun Europeia liuhosi parseiru UNDP tanba durante tinan barak governu seidauk bele konstrui edifísiu foun hodi fó espasu ba membru VPU sira atu halo serbisu.
“Fatin ne’e importante tebes no fatin ne’e dignu atubele halo tratamentu ba sira, tanba vítima sira mai sira vítima ona, la’ós atende ho tratamentu la dingu, dalaruma sira la fó informasaun loloos ne’ebé akontese ba sira, ita espera la’ós de’it iha munisípiu Bobonaro, maibé sei fó mós espasu ba munisípiu sira-ne’ebé kazu buras iha ita-nia rai,” nia hateten.
Reprezentante UNPD, Joniyanto Monetiro, hateten durante tinan barak infrastrutura sira atu fasilita instituisaun PNTL seidauk másimu no presiza tebes melloramentu iha aspeitu oinoin hodi fasilita ba membru VPU atu fó asitensia ba vítima violénsia doméstika atubele hetan tratamentu dignu.
“Ami-nia dezeju susesu ba unidade VPU tomak tantu hosi nasionál to’o iha munisípiu atubele serbisu ho didi’ak, dezempeña tuir lei no orden, nune’e ita bele kombate violénsia hasoru feto no labarik feto ne’ebé mak sai hanesan asuntu importante ba dezenvolvimentu nasionál katak feto nia papél importante tebes iha prosesu dezenvolvimentu sustentánvel no inkluzivu,” nia hateten.
Reprezentante Uniaun Europeia, Carla Silva, haksolok tebes apoia PNTL,no konsidera edifísiu refere importantísimu atubele fasilita membru VPU sira hodi fornese atendimentu no asisténsia ba sobrevivente sira ho digniu.
“Ami hotu simu ho haksolok ho melloramentu fasilidade no lei foun sira hodi kombate violénsia bazea ba jéneru, maibé fasilidade no lei sira mesak labele muda hahalok, situasaun la’o ba oin, maibé ita tenke luta hanesan kestaun pesoál ba ita hotu,” nia apela.
Komandante Jerál Polísia Nasionál Timor-leste (PNTL), Komisáriu Faustino da Costa, sente haksolok no rekoñese obra refere nu’udar onra boot ba instituisaun PNTL tanba durante tinan barak seidauk iha edifísiu própriu ba membru VPU sira atu fó asisténsia ba sobrevivente mai ho tipu kazu oinoin.
“Ohin ita inagura uma ida-ne’ebé foun, uma ida-ne’ebé moos, komandu husu atu uma ida-ne’e ba oin mós nafatin, katak labele iha ema Bobonaro mak sei okupa uma ida-ne’e, signifika ita lakohi kazu violénsia doméstika balun, vítima balu tenke okupa halo fo’er uma ida-ne’e, ho intensaun moos para sempre,” nia afirma.
Notísia relevante:Tinan 2011-2020, VPU Rezista Kazu Infantisídiu Hamutuk 48
Jornalista : Sérgio da Cruz
Editór : Evaristo Soares Martins
