DILI, 02 agostu 2022 (TATOLI)—Programa Uma Kbiit Laek plus (UKL+) iha ona faze verifikasaun no hein aprovasaun lista benifisiariu sira hosi administradór postu administrativu sira tanba nivel suku aprezenta ona lista kandidatu sira ba iha postu administrative sira.
Notísia Relevante: Ekipa PNDS sei sensibiliza UKL+ iha semana oin
“Ami hetan ona lista kandidatu maibé ema barak liu, tanba ne’e ami sei halo verifikasaun antes halo aprovasaun. Nivel suku aprezenta ona lista ba administradór postu maibé seidauk iha resposta no ema hira mak bele sai benifisiáriu ne’e, autoridade postu administrativu seidauk aprova,” Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten ba Agência Tatoli, liuhosi telefónika.
Daudaun ne’e, PNDS hamutuk ho munisípiu no postu administrative sira konklui ona halo sensibilizasaun kona-ba matadalan ba prokrama UKL+ no hein de’it simu aprovosaun ba lista benefisiáriu hosi administradór postu sira.
“Lista ne’ebé mak aprezenta iha nivel suku konforme kuantidade ne’ebe mak aprezenta tanba kada suku ami iha programa rua fahe kalen ba uma-kain 37 no fahe uma 75 ba postu ida,” nia dehan.
Nia dehan lista benefisiáriu ba UKL+ ne’e barak liu entaun presiza halo verifiksaun no UKL+ ne’e hahú implementa ho nia siklu dahuluk nian ne’ebé mak hahú kedas ho sensibilizasaun iha nivel munisípiu depois sensibilizasaun iha postu no aldeia.
Antes ne’e, Governu implementa ona projetu Uma Kbiit La’ek (UKL) ba família kbiit laek sira iha territóriu Timor-Leste, maibé iha tinan 2022 liuhosi orsamentu retifikatifu introdús tan sub programa UKL+ ho orsamentu millaun $25.
Notísia Relevante: Governu estabelese rejime espesiál aprovizionamentu ezekusaun medida UKL+
Jornalista : Osória Marques
Editór : Cancio Ximenes
