DILI, 02 agostu 2022 (TATOLI)—Ekipa hosi Empreza Cladotia Fu Unipessoal Lda, hasoru malu ho Primeiru-Ministru (PM), Taur Matan Ruak, tersa ne’e, hodi halo aprezentasaun proposta investimentu biokonversaun rezíduu orgániku.
“Ami halo aprezentasaun ba Primeiru-Ministru relasaun ho kadeia valór, iha proposta rua, kona-ba maggot hanesan ular ne’ebé fó han hosi lixu orgániku sira bele halo sai razaun animál bele fó han ikan, fahi, no manu-rade. Proposta seluk maka indigofera ne’e hanesan ai-horis ne’ebé nia proteina 26% to’o 31%, ita halo plantasaun ho komunidade oinsá bele halo bokur karau, bibi, fahi no fó han ikan,” Diretór empreza Cladotia Fu Unipesoal Lda, Rui Castro, hateten, hafoin hasoru Xefe Governu, iha Rezidénsia Farol.
Notísia relevante: TNA Solution Aprezenta Proposta Investimentu Jestaun Rezídu Sólidu Urbanu ba KM
Emprezáriu timor-oan ne’e dehan, investimentu ne’e hahú kleur ona no prodús ona, nune’e balun tama ona iha merkadu.
“Kona-ba plantasaun, halo viveiru, iha koordenasaun ho xefe suku iha postu administrativu Metinaro, munisípiu Dili. Enkuantu kona-ba maggot ami prodús kleur ona, iha produtu 11 hosi maggot ne’e rasik, iha adubu been no adubu maran,” nia akresenta.
Nune’e, proposta rua ne’ebé aprezenta ba Governu tanba empreza Cladotia Fu presiza lixu orgániku ne’ebé konsentra iha Tibar.
“Ami husu Governu ajuda oinsá lixu iha Tibar bele hetan fatin ruma maibé ami rona informasaun katak iha empreza balun halo jestaun lixu, ne’ebé ami sei koordena oinsá sira fornese lixu orgániku ne’e mai ami, do que ba hakoi laiha valór ekonomia, ami bele prodús produtu balun bele ajuda ba ema-nia to’os, hakiak na’in no natar na’in sira,” nia tenik.
Nune’e, Xefe Governu apresia ho investimentu ne’e tanba bele ajuda ema hakiak-na’in, agrikultura, no pekuáriu.
“Primeiru-Ministru kontente tanba nia rasik gosta ho atividade sira ne’e,” nia haktuir.
Jornalista : Antónia Gusmão
Editora : Julia Chatarina
