VIQUEQEU, 24 agostu 2022 (TATOLI)–Xefe suku hamutuk na’in-36 iha munisípiu Viqueque ezije ba Governu liuhosi Ministériu Justisa (MJ) hodi fó atendimentu dokumentu hanesan billete identidade (BI) no sertidaun nasimentu ba idozu iha suku ida-idak.
“Ami hanesan xefe suku hosi postu lima iha munisípiu Viqueque hakarak husu ba Ministériu Justisa hodi koloka funsionáriu Rejistu Sivil liuliu Notariadu sira atubele halo atendimentu ba ita-nia idozu sira ne’ebé iha suku 36, nune’e sira bele trata dokumentu iha ida-idak ninia suku,” Portavós Xefe suku Dilor, Jacinto Ximenes, hateten liuhosi konferénsia imprensa iha salaun administrasaun Viqueque, kuarta ne’e.
Notísia relevante: Rejistu Sivil Viqueque menus orsamentu atu atende dokumentu iha baze
Portavós husu ministériu relevante rona autoridade sira-nia prokupasaun tanba oras-ne’e idozu maioria maka laiha dokumentu BI no sertidaun nasimentu. Tanba ne’e, autoridade lokál hosi suku 36 husu ba ministériu kompetente hodi tau konsiderasaun ba preokupasaun sira hosi povu iha baze.
“Foin lalais ne’e Banku Nasionál Komérsiu Timor-Leste (BNCTL, sigla portugés) ba halo pagamentu subsídiu iha suku no fó sai ona katak pagamentu idozu fulan-neen tuir mai, idozu sira ne’ebé simu subsídiu idozu tenke lori ho dokumentu hanesan BI no sertidaun nasimentu. Ho ida-ne’e ami sente katak fulan-neen mai ne’e sei difikulta ita-nia idozu sira tanba daudaun idozu barak mak seidauk iha dokumentu,” nia akresenta.
Nia dehan, bainhira MJ la responde autoridade sira-nia preokupasaun maka autoridade sira sei kontinua ezije ba ministériu hodi fó atendimentu.
“Bainhira ami-nia preokupasaun sira ne’ebé hato’o ba mininistériu relevante la responde, ami sei kontinua ezije ba ministériu hodi fó atendementu dokumentu iha baze, atu labele difikulta ba idozu sira-nia diretu ne’ebé Estadu oferese ona ba sira,” nia tenik.
Tuir Portavós, idozu sira iha munisípiu Viqueque oras-ne’e barak maka ho idade avansadu ona no balun la’o labele, balun dook hosi postu no atu ba munisípiu mós susar.
“Ho preokupasaun sira-ne’e maka autoridade sira hamutuk atu husu Ministériu Justisa hodi halo atendimentu ba idozu sira iha suku. Ami haree ami-nia idozu sira barak maka ho idade avansadu, barak maka agora la’o ladi’ak no balun dook hosi postu no munisípiu,” nia tenik.
Xefe suku 36 kompostu hosi postu Lacluta iha suku haat, postu Ossu iha suku sanulu, postu Uatucarbau iha suku neen, postu Uatulari iha suku neen no postu Viqueque vila iha suku sanulu.
Dadus idozu hosi postu Viqueque Vila iha 2.375, postu Lacluta iha 1.061, postu Uatucarbau iha 1.056, postu Uatulari iha 2.670 no postu Ossu iha 2.131.
Jornalista : Vitorino Lopes da Costa
Editora : Julia Chatarina
