DILI, 26 agostu 2022 (TATOLI)–Servisu Rejistrasaun no Verifikasaun Emprezariál, Institutu Públiku (SERVE, I.P) simu ona pedidu hosi nasaun Austrália, Árabe, no Brunei Darusalam, hodi halo rekrutamentu ba joven timor-oan sira hodi ba serbisu iha sira-nia país.
Diretór Ezekutivu SERVE,I.P, Florêncio Sanches, hateten, husu entidade sira hodi kumpre legalidade sira.
“Ita-nia Embaixadór ba Brunei Darusalam ho ekipa hasoru ona ho ha’u, katak hakarak lori joven timor-oan sira ba servbsu iha ne’ebá, la’ós ne’e de’it maibé hosi mós Austrália no Árabe,” Diretór Ezekutivu SERVE,I.P relata iha salaun Delta Nova, Comoro, sesta ne’e.
Pedidu hosi Brunei ne’e hatudu katak sira akompaña hela dezenvolvimentu Timor-Leste no karater timor-oan durante tinan 10 nia laran, nune’e sira prova timor-oan di’ak liu ho traballadór sira hosi nasaun seluk hodi prefere rekruta timor-oan serbisu iha sira-nia rain.
“Tanba ne’e Embaixadór lori ekipa hosi Brunei ne’e ami hasoru malu no dokumentu legál sira ami finaliza ona, SERVE apoia maka’as ba polítika ida-ne’e atu nune’e ita-nia joven sira atu bá serbisu iha Brunei karik bele ona. Momentu ami hasoru malu ha’u rasik husu katak lian sai kestaun ka lae, sira hatán katak lae tanba sira hatene joven timor-oan barak mak hatene ona inglés, ne’ebé la sai kestaun ba sira,” nia akresenta.
Notísia relevante: TMA sei rekruta timor-oan serbisu iha Brunei Darusalam
Ajénsia hosi Brunei fó kontratu mínimu ba tinan-rua, tanba ne’e SERVE apoia sira ho prosesu rejistu no legalidade sira seluk.
Aleinde ne’e, ekipa hosi Austrália mós hasoru ona ho responsável SERVE, I.P, maibé sira ninia hakarak lakohi liuhosi Governu tanba sira haree ona katak timor-oan hatudu hahalok di’ak iha serbisu fatin.
“Entaun sira hakarak halo rekrutamentu direta ba timor-oan. Ida-ne’e mak ha’u sei ko’alia ho Ministru Koordenadór Asuntu Ekonómiku (MKAE) inklui Sekretaria Estadu Formasaun Profisionál no Empregu (SEFOPE) oinsá buat ne’e bele la’o tanba sira halo rekrutamentu la’ós diretamente fó serbisu maibé sei fó uluk formasaun durante fulan-tolu, hafoin ne’e bele ona serbisu,” nia tenik.
Maski nune’e, Diretór Ezekutivu seidauk bele fó sai naran ajénsia sira hosi país tolu.
SERVE, I.P informa ona ba ekipa sira katak labele halo buat ruma bainhira seidauk hetan lejizlasaun tanba baze legál ne’ebé sira tenke kumpri maka tenke deklara lai aktu konsensiasaun ne’ebé prevee iha lei númeru 10/2017 kona-ba sosiedade komersiál.
Nune’e mós, tenke kumpre mós dekretu-lei númeru 16/2017 kona-ba rejistu komesiál katak hafoin sira deklara aktu sira tenki rejista atu hetan legalidade no kumpre dekretu-lei 34/2017 kona-ba atu halo rekrutamentu tenke hetan lai lisensiamentu.
“Bainhira kumpre ona baze legál tolu ne’e fásil, tanba ne’e maibé ajénsia hosi nasaun tolu ne’e hakarak kumpre entaun ha’u esplika ba sira katak ami iha esperiénsia moruk ne’ebé daudaun akontese katak balun lohi joven sira to’o agora la hetan retornu ne’ebé di’ak,” nia esplika.
Jornalista : Antónia Gusmão
Editora : Julia Chatarina
