BOBONARO,05 setembru 2022 (TATOLI)- Diretór Sekretariadu Tékniku Administrasaun Esleitorál (STAE), munisípiu Bobonaro, Mariano Viegas Amarál, husu lideransa komunitária sira iha postu administrativu neen atu fornese dadus Ema ho Defisiénsia (EhD) ho lolos iha munisípiu refere.
Diretór Mariano halo apelu ne’e atu hatene ema ho defisiénsia nia partisipasaun iha eleisaun prezidensiál liubá, atubele partisipa iha resensiamentu eleitorál nune’e bele hetan kartaun eleitorál atubele ezerse sira-nia direitu votu iha eleisaun sira tuir mai.
Tuir dadus ne’ebé Asosiasaun Defisiénsia Timor-leste (ADTL) rekolla sensu uma-kain tinan 2015 Ema ho Defisiénsia iha territóriu laran hamutuk na’in-38,118 (13%), kompostu hosi tipu defisiénsia matan 14,828, tilun 12,511, fíziku 7,466, mental 3,313 no iha munisípiu Bobonaro rasik na’in-3,247.
Nune’e Mariano dehan, hosi dadus ne’e durante tinan hirak mai ke’e bele mós aumenta no menus hosi dadus anteriór, tanba loron ba loron ema moris no mate kontinua iha.
Notísia relevente: STAE Bobonaro rejista eleitór foun 3.346
“Ami husu xefe suku sira atu koopera, nune’e ita bele hatene totál ita-nia ema ho defisiénsia hira mak iha ita-nia munisípiu, postu to’o suku sira, no atu hatene dadus óbitu atubele hatama iha sistema,” nia hateten iha Maliana.
Xefe suku Colimau, postu administrativu Bobonaro, Aménio Guterres Moniz, prontu koopera ho órgaun eleitorál sira atu rekolla dadus ne’ebé loloos, hodi fasilita ema ho defisiénsia sira bele hetan kartaun eleitorál.
“Nudar autoridade lokál, sei esforsu atu fasilita ita-nia maluk defisiénsia sira, bele hetan kartaun eleitorál, atubele iha oportunidade hodi ezerse sira-nia direitu iha eleisaun sira tuir mai, tanba sira mós hanesan sidadaun di’ak ida ba rai ida-ne’e,” nia katak
Totál eleitór munisípiu Bobonaro ne’ebé ezerse direitu votu iha eleisaun prezidensiál volta daruak na’in-52,499 inklui sentru votasaun paralelu na’in-379 hosi totál eleitór na’in-70,311. Enkuantu totál sentru votasaun hamriik 130 no estasaun votu 150.
Notísia relevante: STAE Bobonaro distribui materiál eleisaun ba sentru votasaun 130
Jornalista: Sérgio da Cruz
Editór: Evaristo Soares Martins
