VIQUEQUE, 11 setembru 2022 (TATOLI)-Ministru Edukasaun Juventude no Desportu (MEJD), Armindo Maia, domingu ne’e, inaugura eskola báziku filial Kaiwa, konstrui hosi salejiani iha suku Liaruca, postu adiministrativu Ossu, munisípiu Viqueque.
“Ohin ha’u mai inaugura edifísiu EBF Kaiwa, eskola ida-ne’e hetan konstrui hosi amu Locatelio, maibé eskola ida-ne’e eskola públiku EBF. Iha tinan kotuk ami tau ona orsamentu, maibé amu Locatelio konsege hetan doadór hodi mai konstrui edifísiu eskola no kapela ida ho pakote ida de’it,” Ministru Armindo Maia, hateten ba jornalista sira, hafoin halo inagurasaun EBF Kaiwa, suku Liaruka, domingu ne’e.
Governante ne’e hatutan, orsamentu ne’ebé governu aloka agora daudaun ba konstru fali EBF Liaruka tanba EBF Kaiwa hetan konstrusaun hosi Salejianu sira.
“Iha inaugurasaun edifísiu EBF Kaiwa ne’e, iha mós apela ida hamutuk ho eskola ida-ne’e ha’u sente di’ak tebes tanba edukasaun iha ita-nia isin no kapela ne’e ba klamar nian”, Armindo hato’o.
Nia dehan, EBF Kaiwa laiha moru protesaun, maibé munisípiu Viqueque tau ona planu hodi kontrui moru.
Koordenadór EBF Kaiwa, Andre da Silva, agradese ba salejianu sira-ne’ebé kontrui ona EBF Kaiwa no kria mos kapela ida iha aldeia Kaiwa ida-ne’e.
“Ami husu agradese ba amu salejianu sira-nian esforsu hodi konstrui ona ami-nia eskola no kria mos kapela ida ba sarani sira iha aldeia Kaiwa. Edifísiu harii ona ami presiza kria moru protesaun hodi asegura eskola ida-ne’e. EBF Kaiwa filiál hosi hosi ensinu Báziku Sentrál (EBC) Mundu Perdido, Ossu”,
Andre haktuir.
Nia dehan, konstrusaun edifísiu EBF Kaiwa hahú janeiru finaliza iha fulan setembru 2022, hamutuk sala tolu, sala profesór ida no hamutuk kapela ida ho totál orsamentu hamutuk millaun $63.
Hosi orsamentu ne’e balun sosa karteira no meza ba eatudante no sosa matéria eskola nian hodi tau ba eskola laran.
EBF Kaiwa profesor na’in-rua permanente ida no kontratadu na’in-ida, klase 1 to’o klase 5 ho totál estudante hamutuk na’in-59 kompostu hosi mane na’in-24 no feto hamutuk na’in-35.
Enkuntu eskola EBF Kaiwa hetan bensaun hosi amu adiministradór apostóliku dioseze Baucau Pe. Alipio Gusmão Pinto.
Iha semónia inagurasaun ne’e partisipa hosi amu parku Ossu no Madre, diretór edukasaun munisípiu Viqueque, komadante Polísia Nasionál Timor Leste (PNTL) munisípiu Viqueque, autoridade lokál no komunidade sira suku Liaruka.
Jornalista: Vitorino Lopes da Costa
Editor : Evaristo Soares Martins
