DILI, 12 setembru 2022 (TATOLI)–Konstrusaun Edifísiu foun andár rua iha Eskola Ensinu Báziku Central (EBC, sigla portugés) Sérgio Vieira de Melo (SVDM) Becora kompleta ho elevadór atu apoiu estudante ho defisiénsia ne’ebé estuda iha eskola ne’e.
Diretór Nasionál Dezenvolvimentu Parke Eskolár, Agostinho Soares, hateten, konstrusaun edifísiu eskola foun andár rua ne’ebé kompleta ho elevadór ne’e foin dahuluk akontese, tanba antes ne’e seidauk iha eskola ida maka hetan apoiu fasilidade hanesan ne’e hodi tulun estudante ho defisiénsia.
“Dezeñu ne’ebé ita prepara ba konstrusaun edifísiu eskola ho modelu andár ne’e iha hotu ninia elevadór atu apoiu ita-nia estudante ho defisiénsia sira bele hetan asesibilidade asesu hariis fatin,” Diretór informa ba Agência Tatoli, iha ninia knaar fatin, MEJD, Vila Verde, segunda ne’e.
Notísia relevante: Konstrusaun Eskola ESJ 10 dezembru ho kustu $108.265,95
Prosesu konstrusaun edifísiu foun seidauk ramata tanba elevadór ne’ebé empreza halo ne’e la tau ninia barreira atu asegura estudante ho defisiénsia sira, tanba ne’e diresaun husu ba empreza atu kompleta tiha maka entrega.
“Konstrusaun edifísiu eskola ne’e hotu ona inklui ho elevadór maibé ita-nia empreza haluha la monta besi iha sorin-sorin hodi asegura estudante ho defisiénsia sira atu asesu ba hariis fatin tanba iha dezeñu ne’ebé ita prepara kompleta, tanba ne’e ita husu sira kompleta tiha maka entrega,” nia tenik.
Empreza Delatina Unipessoal, Lda prontu atu kompleta tan elevadór tanba konsidera inraestrutura ne’e ho ninia rampa ne’e hela de’it 3%, nune’e bainhira kompleta ona bele entrega ba ministériu hodi halo preparasaun ba serimónia inaugurasaun tanba daudaun eskola sira halo hela preparasaun ba ezame nasionál, atu nune’e bele lalais tulun eskola sira bele halo preparasaun.
Enkuantu, estudante ho defisiénsia na’in-lima iha Eskola SVDM ne’e iha hotu ensinu báziku siklu 3, 9o ano, ne’ebé sira ne’e iha problema ho kondisaun fíziku la hanesan.
“Maibé ministériu iha ninia polítika rasik, katak molok mandatu VIII Governu Konstitusionál nia ramata iha tinan oin, eskola sira ne’ebé harii ho andár tenke iha hotu elevadór atu apoiu estudante ho defisiénsia sira,” nia dehan.
Jornalista : Tomé Amado
Editora : Julia Chatarina
