DILI, 13 setembru 2022 (TATOLI)–Jerente nasionál empreza Timor Resources, Filomeno de Andrade, hateten, empreza orgullu ho partisipasaun timor-oan iha kontíudu lokál.
“Iha prosesu ka atividade hotu ne’ebé Timor Resources halo, iha setór ida bolu kontíudu lokál ne’ebé mak partisipasaun timor-oan sira iha atividade hirak ne’e, ezemplu bainhira hala’o teste sísmiku 97% ema ne’ebé servisu ne’e timor-oan, iha Suai 98%, daudaun mós iha atividade perfurasaun timor-oan sira barak servisu iha ne’ebá hamutuk ho ema internasionál balun, to’o iha situasaun ida ita bele hateten katak timor-oan barak ho dedikasaun no esforsu ne’ebé sira halo, sira servisu mínimu hanesan supervizór katak sira servisu besik,” Jerente nasionál empreza Timor Resource, relata hafoin hasoru malu ho Primeiru-Ministru (PM), Taur Matan Ruak, iha Rezidénsia Farol, segunda ne’e.
Notísia relevante: Timor Resources lansa perfurasaun mina posu rua iha semana oin
Ho perspetiva ida-ne’e, Jerente empreza afirma, karik la’o ba oin nafatin, bainhira halo perfurasaun no hetan rezultadu di’ak, maka partisipasaun internasionál bele menus liután no bele to’o pontu ida timor-oan rasik mak esplora riku-soin.
Timor-oan sira ne’e servisu iha atividade sísmiku iha Suai hamutuk 250 no Manufahi mós iha balun.
“Ha’u sente laran haksolok tebes tanba ha’u bele hahí katak ami iha evidénsia katak timor-oan sira mós iha kapasidade atu halo servisu sira. Timor Resources investe esforsu maka’as tebes ba capacity building,” nia tenik.
Jornalista : Antónia Gusmão
Editora : Julia Chatarina
