DILI, 15 setembru 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, husu grupu arte marsiál hotu atu halo avaliasaun interna bebeik ba ida-idak nia organizasaun hodi hadi’a sistema organizasaun.
“Ba grupu ka organizasaun arte marsiál sira-ne’ebé Estadu halo esforsu hodi reativa imi-nia atividade, halo avaliasaun bebeik no halo inspesaun interna bebeik hodi hadi’ak imi-nia sistema organizasionál, lideransa no imi-nia komportamentu iha públiku hodi kontribui ba dezenvolvimentu, kontribui ba paz no estabilidade no kontribui ba kumprimentu lei no orden,” PPN hato’o iha abertura sesaun solene kinta lejislativa iha kinta lejislatura, iha sala plenária PN, kinta ne’e.
Nune’e, Lidér segundu órgaun sobernia ne’e husu hatudu imi-nia kapasidade iha atividade desportiva, atividade sosiál no umanitária no kaer metin prinsípiu fraternidade, solidariedade no atitude ezemplar iha interasaun sosiál no iha solusaun ba problema sira.
“Mensajen hanesan ha;u hakarak hato’o mós ba grupu arte rituál sira hotu no ba joven sira iha Timor-Leste, hotu-hotu hamutuk fó liman ba malu hodi kria pás, hakmatek no dezenvolve ita-nia rai Timor-Leste,” nia apela.
Jornalista : Nelson de Sousa
Editór : Cancio Ximenes
