KEFAMENANU, 24 setembru 2022 (TATOLI) – Autoridade Timor Tengah Utara (TTU) no Autoridade Rejiaun Administrativa Espesiál Oé-Cusse Ambeno (RAEOA), sesta ne’e diskute futuru kooperasaun kona-bá asuntu tékniku iha setór agrikultura nian.
“Diresaun Rejionál Agrikultura ne’ebé ohin diskute oinsá serbisu hamutuk ho Governu TTU, liuliu iha setór agrikultura, kona-bá serbisu tékniku sira-ne’ebé iha agrikultura TTU nian, tán ne’e ohin ami hahú diskute ona hanesan faze inísiu,” Diretór Diresaun Rejionál Agrikultura, Cirilo dos Remedios Baba, informa ba Agência Tatoli iha Otél Livero, Kefamenanu, sesta ne’e.
Nia informa, diskusaun ne’e iha ona koneksaun ba malu, kona-bá tékniku tanba jeralmente iklima topografiamente TTU ho RAEOA kuaze hanesan.
“Ne’ebé iha-ne’e ita hetan oportunidade sira bele apoiu no troka produtu, TTU apoiu fini haree nia durasaun loron 70 de’it ita bele kolleta, no apoiu ita mós kona-bá adubu ida likuidu adubu organiku nian, ita bele aplika ba rai, no mós uza kura moras kulit no bele mós hemu, inklui apoiu plantasaun,” nia afirma.
Diretór Agrikultura ne’e hatete, durante iha deskusaun ne’e, iha reasaun apresiasaun tanba TTU ho RAEOA territóriu ida de’it, maibé fahe iha liña fronteira, entaun ne’e oportunidade di’ak oinsá promove rekusu lokál sira, liuliu ba asuntu tékniku, nune’e bele hamenus subsídiu adubu ka pestisida anorgániku hosi Governu.
Tanba maioria kondisaun rai agora menus ona ho konteúdu mikro sira-ne’ebé importante iha rai laran, tán ne’e maka autoridade sira ohin mai tenta katak oportunidade di’ak iha eventu komemorasaun aniversáriu sidade Kefamenanu ba tinan 100 bele hasoru malu atu halo diskusaun ba solusaun setór agrikultura nian.
“Ohin ita sei deskuti, tuir planu ita sei hato’o asuntu ne’e ba Prezidente Autoridade RAEOA, halo diskusaun iha reniaun autoridade, nune’e ita bele trasa planu ba kooperasaun ne’e, tanba Oé-Cusse produtu ne’ebé ita prodús maioria produtu orgániku, ida-ne’e maka TTU nia esperansa,” nia katak.
Xefe Departamentu Produsaun Pestisida Organiku no Adubu Orgániku Diresaun Agrikultura TTU, Charles Malelat, lakohi fó informasaun ho razaun katak, nia parte só halo diskusaun maibé direitu fó-sai informasaun só diretór diresaun agrikultura TTU nian.
Entretantu, durante halo diskusaun ba futuru kooperasaun ne’e, akompaña hosi Adjunta Prezidente Autoridade RAEOA, Leonia da Costa Monteiro, Sekretáriu Rejionál Asuntu Agrikultura, José Eta no Sekretáriu Rejionál Asuntu Komérsiu no Indústria.
Notísia relevante: Aniversáriu sidade Kefamenanu, nu’udar opurtunidade hametin kooperasaun entre RAEOA-TTU
Jornalista: Abílio Elo Nini
Editór: Evaristo Soares Martins
