COVALIMA, 29 setembru 2022 (TATOLI) – Sekretáriu Tékniku Administrasaun Eleitorál (STAE), munisípiu Covalima rejista ona dadus provizóriu eleitór tuan no foun hamutuk na’in 1.107. Resistu halao liuhosi atividade resensiamentu eleitorál.
“Ami halo atendementu resensiamentu eleitorál no atualiza baze dadus hahú fulan maiu to’o agustu 2022. Hosi resensiamentu ne’e dadus provizóriu eleitór hamutuk na’in- 1, 107. Hosi númeru ne’e eleitór foun na’in-436 no eleitór tuan ne’ebé atualiza dadus fali dadus tanba kartaun eleitoral lakon, tohar no muda hela fatin hamutuk 671. Maibe, iha setembru sei halo tan ajustamentu dadus eleitór sira”, Diretór STAE Covalima, Francisco Gusmão hateten ba Tatoli, iha nia kna’ar fatin Kampun-baru, sesta ne’e.
Diretór STAE Covalima, nee mos dehan atividade resensiamentu eleitór ba sidadaun Timor-Leste ne’ebé atinji ona tinan 16 ba leten no seidauk rejistu ,tenke lori dokumentu sira hanesan sertidaun RDTL Orijinál no mós bileti identidade (BI) ka pasaporte Timor-Leste.
Nia mos husu ba sidadaun sira ne’ebé hakarak muda hela fatin tenke lori dokumentu sira hanesan,deklarasaun hosi xefi suku, sertidaun RDTL, BI ka pasaporte Timor-Leste.
“Ba sira-ne’ebé kartaun lakon,lori dokumentu sira hanesan ,deklarasaun kartaun lakon hosi Polísia Nasionál Timor-Leste (PNTL), sertidaun RDTL ka BI no pasaporte Timor-Leste,” hatete nia.
STEA Covalimakontinua halo atendementu ba sidadaun sira ne’ebé atu trata sira-nia kartaun eleitorál, tanba ida ne’e hanesan atividade rutina no sei halao to’o loron 30 fulan novembru 2022.
Jornalista : Celestina Teles
Editóra : Armandina Moniz
