DILI, 05 outobru 2022 (TATOLI)— Vise Ministru Interior (V-MI), António Armindo, hateten iha tinan oin, Governu prioritiza fó formasaun ba Polísia Nasionál Timor-Leste (PNTL) kona-ba krime sibernétika.
“Ha’u hanoin tinan oin ita prioritiza formasaun iha área krime sibernétika ba Polisia Nasionál Timor-Leste (PNTL) tanba mundu ohin loron ne’e sai ona mundu dijitál, ne’ebé iha ameasa sira ba soberanu Estadu liuhosi tipu krime sibernétika,” Vise Ministru Interiór (VMI), ne’e iha Sentru Formasaun Polísia (CFP,Sigla Portugés), kuarta ne’e.
Governante ne’e hato’o kestaun ne’e bainhira partisipa seremonia diskusaun Planu Estratéjiku Polísia Nasionál Timor-Leste (PNTL).
Tanba nia dehan ema kriminozu sira atu halo aktu krime organizadu sei la uza meiu tradisionál sira, maibé ba futuru kriminozu sira bele uza meiu dijitalizasaun.
Nune’e, PNTL tenke aposta ba formasaun sibernétika, nune’e sira bele hatene saida maka no uzu iha futuru mosu krime hirak ne’e bele iha ona koñesimentu kle’an atu prevene no kombate.
Planu Estratéjiku PNTL nian ba tinan 2023 iha prioridade tolu, hanesan dezenvolvimentu seguransa nasionál, dezenvolvimentu igualdade Jenéru iha PNTL no Fortalismentu institusionál.
Iha seguransa nasionál ne’e fó prioridade atu mellora serbisu PNTL nian hodi fó seguransa ba ema hotu liu hosi Vizibilidade, Integridade no Profisionalizmu (VIP).
Vizibilidade ne’e ejize PNTL tenke serbisu besik liu komunidade, kontinua fó seguransa ba komunidade ho profisionál, nune’e komunidade bele sente seguru no livre.
Enkuantu iha prioridade seguransa nasionál ne’e mós foku ba fortalesimentu seguransa iha fronteira no kapasitasaun ba membru PNTL sira.
“Governu sei la taka matan ba problema ne’ebé maka institusaun PNTL hasoru, sei kontinua tau osan atu hadi’a infraestrutura PNTL nian no sosa ekipamentu sira no kontinua tau mós prioridade ba formasaun sira atu PNTL bele profisionál liután iha serbisu,” nia afirma.
Jornalista: Natalino Costa
Editór : Florencio Miranda Ximenes
