BOBONARO, 21 outubru 2022 (TATOLI)— Administradór postu administrativu Cailaco, munisípiu Bobonaro, Alfredo Meta-Dau, hateten Ministériu Obras Públika (MOP) presiza aselera projetu estrada urbana Cailaco hodi fasilita movimentu ema inklui transporte públiku.
Alfredo Meta-Dau, haktuir iha loron 23 fulan-setembru ne’e ekipa MOP konsege vizita lokaliazaun (site visited) hahú hosi baliza suku Ritabou ba to’o ponte Bilimau.
“Iha tempu badak espera ke sei hetan tékniku sira ne’ebé atu halo BOQ no dezeñu sira-ne’e atu lori ba prosesu konkursu públiku, ita-nia esforsu atu estadu ho governu aselera, maibé ne’e depende ba governu tanba mega projetu sira-ne’e parte Governu
Sentrál nia kompeténsia,” nia informa ba Jornalista sira, iha Cailaco.
Purtantu estrada Urbana Cailaco Vila konstrui dezde okupasaun Indonézia to’o agora, no iha tinan hirak liubá governu anteriór konsege tau iha prioridade atu rezolve maibé la konsege tanba kestaun polítika.
Nune’e administradór Alfredo prontu kopera parte hotu tanba ne’e nafatin ezije governu atu implementa projetu ne’e tanba povu Cailaco durante tinan 20 resin ona halerik hela ba estrada.
“Ein-prinsípiu ha’u nu’udar administradór foun, mai ho hanoin foun, atu halo buat foun ba postu administrativu Cailaco, ha’u la haree ba kotuk, saida mak liu ona ba kotuk ne’e hanesan istória pasadu, agora tenke hateke ba oin, saida mak ladi’ak ita labele haree, ita hare saida maka di’ak la’o ba oin,” nia hateten.
Postu administrativu Cailaco iha aldeia 24, suku ualu ho totál populasaun 13,906 komposta hosi mane 7.604, feto 6,258, ho totál xefe família 2,971.
Jornalista : Sérgio da Cruz
Editór : Evaristo Soares Martins
