VIQUEQUE, 23 outubru 2022 (TATOLI)–Komandante PNTL Eskuadra Viqueque Vila, Sargentu Xefe Polísia, Venseslau Moreira de Oliveira Freitas, sujere ba Servisu Edukasaun munisípiu Viqueque atu parte seguransa akompaña bainhira distribui matéria ezame nasionál mai munisípiu.
“Ha’u fó hatene ona Diretór Edukasaun, tinan oin osan hodi seguransa sira akompaña, labele akontese hanesan iha Same no Ainaro nian tanba dokumentu nasaun nian ne’e importante. Bainhira Edukasaun sira de’it mak mak ba foti matéria ezame nasionál no tuir dalan maka akontese buat ruma, sé maka hatene halo tiha buat ida iha matéria laran depois mai entrega ba Polísia, ami la hatene. Ami asegura de’it iha Eskuadra. Ho ida-ne’e maka ha’u fó hatene ba Diretór Edukasaun sira, maski ita haree suratan maibé segredu nasaun nian presiza kuidadu,” Komandante PNTL Eskuadra Viqueque Vila hateten ba Agência Tatoli, iha Eskuadra PNTL, postu administrativu Viqueque Vila, domingu ne’e.
Notísia relevante: Servisu Edukasaun Viqueque rejista kandidatu finalista ezame nasionál na’in-3.296
Edukasaun munisípiu Viqueque entrega ona matéria ezame nasionál ba PNTL Eskuadra hodi halo vijilánsia, nune’e iha segunda (24/10) mak diretór eskola sira foti iha Eskuadra.
“Ami matein fó seguransa ba matéria ezame nasionál sira,” nia akresenta.
Iha fatin ketak, Diretór Servisu Edukasaun munisípiu Viqueque, Emídio Amaral, haktuir, matéria ezame distribui ona iha postu lima no aseguradu iha Eskuadra PNTL.
“Aban dadeer diretór eskola sira foti pontu ezame nasionál no profesór sira bá hatama fali iha Eskuadra to’o loron 27 outubru maka ami ba foti hodi lori bá nasionál,” nia tenik.
Tuir planu, ezame nasionál iha munisípiu Viqueque sei halo abertura iha Eskola Sekundáriu Jerál (ESJ) 04 setembru Viqueque iha tuku 07:35 dadeer, iha loron 24 outubru 2022.
Tuir dadus estudante finalista 3.296 iha munisípiu Viqueque sei partisipa iha ezame nasionál, kompostu hosi hosi Eskola Ensinu Báziku Sentrál (EBC, sigla portugés) 1.897, ESJ 1.306, no Eskola Ensinu Sekundáriu Tékniku Vokasionál (ESTV) 93.
Jornalista : Vitorino Lopes da Costa
Editora : Julia Chatarina
