VIQUEQUE, 27 outubru 2022 (TATOLI)—Xefe suku Uma-Uain Leten, Martinho Soares Gusmão, hateten, Protesaun sivil no Cruz Vermella Timor Leste (CVTL) fó ona apoiu pakote emerjénsia ba vítima inséndiu iha munisípiu Viqueque.
“Akontesementu ne’e iha loron 22 outubru tuku 10:00 dadeer, ahi han inan faluk, Celestina Saldanha nia uma iha aldeia Tutukui, suku Uma-Uain Leten, postu administrativu Viqueque Vila, munisípiu Viqueque. Parte Protesaun Sivil no CVTL sira fó ona apoiu pakote emerjénsia iha loron segunda 24 outubru ne’e,” Xefe suku Uma Uain Leten, Martinho Soares Gusmão, hateten ba Agência Tatoli, via telefónika, kinta ne’e.
Notísia relevante: Ahi han feto faluk Celestina nia uma iha Uma Uain Leten
Pakote emerjénsia sira hanesan foos, mina, supermi, sanan, bikan, biskuit, lona no sasán emerjénsia sira seluk.
Insidente ne’e rezulta ahi-han mohu inan faluk Celestina nia uma kakuluk maibé komunidade konsege lori feto faluk ne’e sai hosi uma-laran.
“Vítima ninia sasán sira iha uma laran balun komunidade lokál bele salva maibé balun la konsege salva,” nia akresenta.
Jornalista : Vitorino Lopes da Costa
Editora : Julia Chatarina
