DILI, 16 novembru 2022 (TATOLI)—Diretór Nasionál Turizmu Komunitáriu no Kulturál, Moises Tilman, informa Ministériu Turizmu Komérsiu no Indústria (MTCI) konsege identifika fatin turístiku 11 hosi turizmu komunitáriu iha Timor-Leste, tanba programa sira-ne’e importante atu dezenvolve no bele fó benefísiu ba populasaun lokál.
Responsável ne’e esplika, ho turizmu komunitária ne’e Governu aloka ona osan millaun $1 iha tinan 2022, hodi halo dezenvolvimentu ba programa hirak ne’e no ministériu ezekuta ona 20%.
“Tinan ida-ne’e ami instala dezenvolvimentu turizmu komunitáriu iha suku ualu iha munisípiu Ainaro, Bobonaro, Covalima, Manufahi, Liquiça no Lautém. Ami mós identifika fatin atu halo viajen ba programa rezisténsia iha munisípiu Baucau, Lospalos no Viqueque,” Diretór ne’e hateten ba Agência Tatoli, iha Faról, kuarta ne’e.
Diretor ne’e esplika, dezenvolvimentu ba fatin hirak ne’e iha hela prosesu atu hetan materiál sira, programa ne’e iha orsamentu hamutuk rihun $320.
Aleinde ne’e, Governu hala’o programa jornada CAFE Mambae ne’ebé atu dezenvolve no konserva kafé antigu nian.
Ministériu Turizmu Komérsiu no Indústria (MTCI) bele simu proposta hosi komunidade kona-ba dezenvolvimentu fatin turizmu no istóriku sira.
Governu sei fó apoiu nafatin ba atividade kulturál ida-ne’e atu atrai turista no prezerva kultura, ezemplu atividade kolleta iha Lospalos no peska iha Ataúro, atividade Uma-Lulik iha Aileu.
“Ami fó apoiu ba populasaun ho osan rihun $24-resin ba eventu kulturál,” nia dehan.
Maske programa ne’e la’o hela, maibé estrada sira halo susar tebes atu hala’o programa hirak-ne’e.
Jornalista : Osoria Marques
Editór : Cancio Ximenes
