DILI, 23 novembru 2022 (TATOLI)—Adjuntu Prezidente Autoridade Munisípiu Dili, António Moniz Clau, informa relasiona ho udan ne’e monu rai daudaun ona mak Governu liuhosi Autoridade Munisípiu Dili estabelese ona ekipa dezastre naturál munisípiu Dili.
Ekipa ne’e estabelese atu bele atende lalais bainhira mosu dezastre naturál ka inundasaun akontese iha kapitál Dili no ekipa ne’e diretamente integra ona ho Diresaun Dezastre Naturál Nasionál.
“Munisípiu Dili, momentu ne’e harii ona ekipa dezastre naturál munisípiu Dili ninian, ne’ebé ita sei koloka ekipa tolu (3) hanesan ekipa ida lídera hosi parte Dom Aleixo, ida lídera hosi parte kláran Vera Cruz no ekipa ida lídera hosi Nain Feto no Cristo Rei, atu nune’e kuandu akontese buat ruma, ekipa sira-ne’e diretamente integra ona ho Dirasaun Dezastre Naturál Nasionál ninian, nune’e ita la buka malu no organizadu ona,”António Moniz Clau informa ba Agéncia Tatoli iha nia kna’ar fatin, kuarta ne’e.
Objetivu estabelese ekipa ne’e tanba Munisípiu Dili foti referénsia iha tinan kotuk bainhira akontese buat ruma Munisípiu Dili buka kargu xefia sira la hetan, tanba dala ruma mosu inundasaun Prezidente Autoridade Munisípiu Dili, Guilhermina F.S. Ribeiro, mak tun direta.
“Maibé, dala ruma ami-na’in rua (2) tun, Diretór ida no rua akompaña maibé la másimu, entaun iha tinan ne’e ita organiza no prepara-an halo di’ak atu nune’e buat ruma mosu ami labele halai ba-mai. Hanesan orsida ami halai ba Dom Aleixo no ami duni mak halai fali ba Cristo Rei, nune’e ami halai fali mai iha klaran, entaun ho tinan ne’e ita foti referénsia fali iha tinan kotuk. Ita ida-idak koloka kedan ona, nune’e kuandu akontese iha Comoro ekipa Dom Aleixo mak ba, akontese iha Vera Cruz ekipa iha Vera Cruz nian ba no kuandu akontese fali iha parte Leste ekipa Cristo Rei ho ekipa ida-ne’ebé ita monta iha Cristo Rei ho Nain Feto mak ba,” esplika.
Kona-ba ekipa ida ema na’in hira, nia hateten, ida ne’e lista hosi parte Dirasaun Rekursu Umanu ne’ebé agora daudaun sei prepara.
Entretantu, tuir Adjuntu Prezidente Autoridade Munisípiu Dili, António Moniz Clau, katak ekipa ne’ebé koloka ne’e Autoridade Munisípiu Dili tau kedan ekipa ida ho karreta ida, aleende ne’e prepara mós apoiu umanitáriu.
AMD orienta pesoál saneamentu halo limpeza
Alainde ne’e, adjuntu Prezidente Autoridade Munisípiu Dili, António Moniz Clau, informa relasiona ho udan boot iha semana kotuk halo foer namkari iha kapitál Dili, Governu liuhosi Autoridade Munisípiu Dili (AMD) orienta ona pesoál saneamentu halo limpeza.
“Ha’u hanoin iha semana kotuk, kona-ba bee sa’e iha fatin-fatin ita haree ne’e natureza, maibé ko’alia kona-ba lixu depois bee sa’e lixu namkari, ita orienta kedas ita-nia funsionáriu sira halo limpeza, ne’ebé agora ita la’o hela no servisu la’o normál. Maibé, se imi haree katak iha fatin ruma fo’er sei bou namkari nafatin, hato’o nafatin mai ami atu orienta ita-nia pesoál sira halo limpeza,” António Moniz Clau informa.
Tuir nia, lixu sira ne’ebé namkari iha Díli laran ne’e la’ós buat moris maibé mai hosi ema-ne’ebé so’e lixu la tuir nia fatin no laiha konxiénsia atu so’e lixu, entaun ho ida ne’e udan tun mota lori hotu mai namkari iha estrada laran.
“Maibé, ida ne’e ita hato’o ona informasaun ba komunidade oinsá so’e lixu tuir oras, hanesan dadeersan so’e to’o tuku 06h00, loraik so’e hahú 07h00 oras kalan no liu ona oras ida-ne’e labele so’e ona, nune’e ita-nia karreta sira-ne’ebé ita kontratu ba raut tiha, depois ema so’e fila-fali. Entaun lixu sira-ne’e kontinua eziste hela, bainhira udan tun mai lori sai hotu ba estrada laran,” nia dehan.
Aleinde ne’e, Autoridade Munisípiu Dili orienta ona ba xefe suku no xefe aldeia sira atu halo tuir orden ne’ebé Munisípiu Dili hatún.
“Tanba, sidade Dili ne’e atu moos la’ós munisípiu Dili nia responsabilidade maibé ita hotu nia responsabilidade, entaun foer ne’e lalika so’e tun iha kanu kuak maibé tenke so’e tuir oras ne’ebé ita orienta ona ba kraik, atu nunee ita bele halo jestaun di’ak,” nia informa.
Autoridade Munisípiu Dili bele halo jestaun to’o dala 10 ba lixu, maibé konxiénsia komunidade nian laiha hanesan de’it.
“Tanba ne’e, agora ita esforsu hela atu oinsá para sensibiliza didi’ak asuntu ne’e ba ita-nia komunidade munisípiu Dili atu kumpre ka hatene. Tanba, ita haree katak tinan-tinan lixu ne’e mak ita rezolve la hotu, entaun problema ne’e saida. Problema mak ita-nia mentál, ne’ebé ita-nia konxiénsia han iha ne’e no so’e tun iha kedan ne’e. Maibé, ita-nia prontu ita servisu nafatin tuir saida mak ita bele halo, halo nafatin to’o loron ida ita sei to’o iha ne’ebá atu lori ita-nia komunidade bele kompreende. Katak, ita moris iha sidade Dili, haree rasik mak ita halo tuir,” nia dehan.
Aleinde ne’e, PMOPA ativu fali ona kada postu iha ema na’in-35 ne’ebé ativu ona entaun espera katak iha udan ne’e Munisípiu Dili bele organiza sira, lais liu para bele halo limpeza, maibé problema mak sábadu no domingu pesoál saneamentu ne’e la servisu, entaun koko atu orienta mós ba administradór postu atu PMOPA ne’e sebele tau mós ita-nia maluk sira-ne’ebé servisu iha programa ne’e, atu bele asegura iha sábadu no domingu.
Kona-ba rai rahun ne’ebé makaas iha área Eskola Sekundáriu 04 Setembru, nia hatán, ida-ne’e halai liu ba Obras Públiku mak bele responde, tanba durante estrada públiku Munisípiu Dili nian maka dasa fo’er.
“Maibé, uluk iha abril 2021 ne’ebé dezastre akontese Ministru orienta atu ita kontratu tratór sira halo duni limpeza, maibé tinan ida-ne’e ita haree katak sei tama hela situasaun normál, entaun seidauk iha orientasaun, maibé prontu ha’u haree kona-ba estrada obras públiku nia kompeténsia,” nia dehan.
Jornalista : Nelia Fernandes
Editór : Cancio Ximenes
