DILI, 12 dezembru 2022 (TATOLI) – Ministériu Ensinu Superiór, Siénsia no Kultura (MESSK) publika ona iha Jornál Repúblika lista estudante finalista na’in-510 hosi Institute of Business (IOB) ne’ebé atu simu graduasaun iha loron 19-20 dezembru 2022.
Reitór IOB, Pedro Ximenes, haktuir planu no programa graduasaun IOB nian ba loron rua, hahú hosi 19-20 dezembru 2022 ne’e loos hotu ona tanba dadus estudante 510 ne’ebé submete Ministériu Ensinu Superiór, Siénsia no Kultura (MESSK) ne’e hetan hotu ona verifikasaun no Ministru Longuinhos mós hato’o ona ninia paresér no naran estudante sira-nian públika ona iha Jornál Repúblika.
“Ita-nia planu graduasaun ba estudante 510 loos hotu ona, ne’ebé serimónia sei hahú iha loron rua, hosi dia 19 no dia 20,” Reitór Pedro hato’o asuntu ne’e ba Tatoli iha kampus IOB, Manleu, segunda ne’e.
Tuir nia, serimónia graduasaun ne’e sei fahe ba parte rua. Parte dahuluk sei hahú iha loron 19 ba graduadu na’in-255 hosi fakuldade ospitalidade turizmu no fakuldade ekonomia. Depois iha fali loron 20 dezembru 2022 graduasaun sei halo ba estudante finalista na’in-255 hosi fakuldade ICT no fakuldade mestradu nian.
“Ita halo ona konfirmasaun ho gabinete Ministru nian no konfirmandu ona katak Ministru rasik maka sei partisipa direita iha serimónia graduasaun ne’e,” nia tenik.
Hosi totál graduadu IOB nian konta hamutuk ho estudante finalista ne’ebé atu graduasaun iha tinan ida-ne’e hamutuk ona na’in-3.200 no estudante ativu hamutuk 3.300 no planu IOB nian ba tinan 2023 ne’e sei simu tán estudante foun hamutuk 800 ne’ebé sei koloka ba fakuldade tolu no mestradu ida.
Jornalista : Tomé Amado
Editór : Evaristo Soares Martins
