DILI, 16 dezembru 2022 (TATOLI)—Prezidente Repúblika (PR), José Ramos Horta, prefere nia-parte hala’o vizita Estadu ba rai-li’ur sei uza aviaun Aero Dili ne’ebé ho bandeira Timor-Leste (TL).
Notísia Relevante: PR Horta apresia aviaun Aero Dili sei semo ho bandeira RDTL
“Konforme aviaun ne’ebé ba ne’ebé-ne’ebé nu’udar Prezidente Repúblika ha’u sei fó instrusaun ba halo viajen ruma uza aviaun timoroan nian,” Xefe Estadu ne’e hateten ba jornalista sira hafoin halo enkontru ho Diretór Empreza Aero Dili, Lourenço de Oliveira, iha Palásiu Prezidensiál, Bairru Pite, sesta ne’e.
Empreza Aero Dili loké tan voo komersiál nivél internasionál, kompara ho antes ne’e voo doméstiku de’it rute Dili-Covalima no Dili-RAEOA.
Nune’e, iha fulan-janeiru 2023 sei loké voo tuir Timor-Leste ba nasaun sira-ne’ebé mak iha ona ASA (Air Services Agreement-Akordu Serbisu Aero).
“Lourenço Ataúro, ema timoroan primeiru emprendedór ho inisiativa korajen no kbiit sempre buka halo kontribui ba ekonómia,” Horta hateten.
Tuir Ramos Horta, emprezáriu Lorenço halo negósiu haki’ak boek iha Ataúro ne’ebé nia-parte ba bebeik vizita, no nia uluk oferese aviaun ida ba F-FDTL.
“Agora nia halo kontratu ho kompañia boot hodi aviaun boot mai Prezidénsia sei apoiu 100% tuir responsabilidade Prezidente nian no Governu mak tenke haree insentiva saida mak bele,” Horta dehan.
Xefe Estadu fó ezemplu, dalaruma rona billete hosi ne’e ba Darwin, Singapura karun tebes tanba konbustível aviaun nian espesiál.
Parte seluk enke haree mós bainhira aviaun ne’e para iha ne’e selu.
“Maibé se aviaun ka kompañia ita-nian rejistu iha ne’e, aviaun ne’e nia aluga osan boot halo lizin la’ós sosa, lizin mak di’ak liu duni purtantu aviaun ne’e hanesan ninian mais nia la’ós na’in ba aviaun ne’e, di’akliu tanba kompañia na’in mak halo manutensaun no pilotu,” nia hateten.
Entaun, Horta dehan, Governu tenke haree duni oinsá fó insentivu ba investidór ne’e, nune’e nia parte sei ko’alia ho Primeiru-Ministru hodi haree.
Jornalista : Nelson de Sousa
Editór : Cancio Ximenes
