OÉ-CUSSE, 12 janeiru 2023 (TATOLI) – Sekretaria Rejionál ba Asuntu Finansa, iha Rejiaun Administrativa Espesiál Oé-Cusse Ambeno (RAEOA), Maria Eliza Maniquim, informa, durante tinan 2022 operasaun aviaun Zona Espesiál Ekonónomia Sosiál Merkadu (ZEESM) konsege rekolla reseita ba kofre Estadu hamutuk $696,821.50 hosi presu billete.
“Reseita ne’e só aeroportu Rota do Sândalo de’it seidauk inklui aeroportu Díli, ida-ne’e ita hetan hosi billete aviaun ninian,” Maria Eliza Maniquim, hatete iha Oé-Cusse, kinta ne’e.
Notísia relevante: Governu planeia transforma aviaun ZEESM sai transporte aérea nasionál
Reseita ne’e rekolla hahú hosi janeiru to’o de’it novembru 2022, seidauk inklui fulan-dezembru nian tanba daudaun ne’e tékniku sira sei verifika hela dadus sira kona-bá aeroportu Dili nian ne’e tuir planu sei remata iha loron domingu 15 janeiru ne’e.
“Durante operasaun aviaun iha 2022, Autoridade mantein kaléndariu viajen nian, laiha mudansa, hosi Díli ba Oé-Cusse no ba Suai, no presu mós laiha mudansa tanba ita iha presu tolu, ba labarik $20,00, billete komún $40,00 ba sira-ne’ebé maka iha orden servisu $50,00,” nia katak.
Tuir nia, reseita tinan 2022 iha mudansa sa’e kompara ho tinan 2021 tanba situasaun COVID-19, nune’e movimentu transporte aéreu ninian dalaruma la halo operasaun, maibé iha tinan 2022 kontinua halo operasaun hanesan bainbain.
Entretantu tuir dadus ne’ebé Agência Tatoli asesu iha Gabinete Prezidente Autoridade RAEOA liuhosi servisu transporte aéreu no aeroportu Rota do Sândalo nian kona-bá estatístika movimentu pasajeiru ho transporte aviaun twin otter hahú hosi janeiru to’o Dezembru 2022 konsege fasilita movimentu pasajeiru na’in-20.521 bainhira halo operasaun hosi Dili-Oé-Cusse no Dili-Suai.
Komposta hosi Díli- Oé-Cusse semo dala-435 ho totál pasajeiru na’in-19.114 no Dili-Suai semo dala-47 ho totál pasajeiru hamutuk na’in-1407.
Notísia relevante: Autoridade RAEOA rekolla reseita rihun $395-resin hosi operasaun aviaun ZEESM
Jornalista : Abílio Elo Nini
Editór : Evaristo Soares Martins
