DILI, 12 janeiru 2023 (TATOLI)—Primeiru-Ministru (PM), Taur Matan Ruak, hateten Governu esforsu hotu apoiu vítima dezástre naturál hamutuk 360-resin iha territóriu nasionál.
“Ami ko’alia uitoan situasaun dezastre naturál ne’ebé afeta ita-nia populasaun hosi fulan rua nia laran dezembru 2022 no janeiru 2023, iha kuaze ita nia populasaun 360-resin mak afeta iha Timor laran tomak balun rai monu mak afeta, ahí han uma, anin sobu. No, Governu esforsu makaas halo oinsá tau matan ba sira,” PM Taur hateten ba jornalista sira hafoin hala’o enkontru semanál ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Tuir Xefe Governu, kampara ho tinan 2020 no 2021 ne’e menus loos maibé família no inan aman sira mak afetadu, entaun Governu buka dalan ajuda sira no minimiza todan ne’ebé sira hasoru,
PM mós relata anin boot foin lala’is ne’ebé akonte ne’e, afeta mós eskola 10 iha territóriu hetan sobu, nune’e Governu halo esforsu atu rezolve.
Enkuantu, tuir prosesu normál hosi parte servisu protesaun sivíl nian halo intervensaun ba família vítima dezástre naturál mak fó uluk apoiu umanitária hanesan foos, mina sona, ikan lata, sasán dapúr ho seluk tan hafoin tuir mai sei indentifika uma ne’ebé estragu tuir kategória hafoin apoiu materiál konstrusaun.
Jornalista : Nelson de Sousa
Editór : Cancio Ximenes
