DILI, 03 fevereiru 2023 (TATOLI)–Diretór Servisu Edukasaun Munisipál sira ezije ba superiór Ministériu Edukasaun Juventude no Desportu atu rezolve lalais asuntu bolsa méritu ne’e, tanba millaun $7.2 ne’ebé prevee ona atu apoiu estudante melor klasifikadu 13.000-resin iha territóriu nasionál ne’e mak atraza sei fila-fali ba kofre estadu iha tempu besik.
Tuir Diretór Servisu Edukasaun Munisípiu Liquiça (DSEML), Carlos Lopez, hateten iha Liquiça konsidera mosu difikuldade hodi impede hela prosesu bolsa méritu tanba inan-aman hosi estudante ne’ebé tama mellór klasifikadu ne’e balun mate ona, labarik balun sei ki’ik laiha sertidaun, balun sei jentiu no dokumentu ida mós laiha.
Maibé, nia hateten, Banku ninia atendimentu ba labarik sira-ne’e mak demora tanba kada loron ida Banku simu estudante entre na’in-neen (6) mai kraik, tanba ne’e mak prejudika tebes estudante sira atu hetan sira-nia konta bankária.
“Ami realiza ona enkontru ho diretór jerál iha Ministériu, ami relata mós situasaun sira ba Ministériu atu sira bele ko’alia mós ho Banku sentrál atu bele orienta tanba sukursál sira atu aselera konta bankária ba alunu sira ho lais,” Carlos Lopez hateten ba Agência Tatoli liuhosi telefónika, sesta ne’e.
Maibé, nia dehan, to’o agora nia seidauk hetan informasaun hosi Ministériu Edukasaun kona-ba preokupasaun Diretór sira-nian ho Banku Central ninia atendimentu ne’e.
“Ha’u lahatene diretór jerál ho vise ministru ba ko’alia ho banku sira-ne’e ka lae, tanba preokupasaun sira-ne’e hotu mak ami diretór 14 aprezenta ona ne’e,” nia dehan.
Nia dehan, espera katak segunda agora Ministériu Edukasaun bele hasai ona sirkulár ida ba banku sira atu bele aselera prosesu atendimentu ba estudante bolsa méritu sira iha territóriu nasionál ho lalais, tanba osan millaun $7.2 ne’e to’o de’it marsu ka abríl mak atraza sei fila-fali ba kofre Estadu.
Tanba ne’e, tuir nia, sira diretór hotu preokupa makaas hodi ezije Ministériu Edukasaun atu rezolve lalais asuntu bolsa méritu ne’e, nune’e programa ida-ne’e bele sai realidade tanba programa bolsa méritu ne’e atu motiva estudante sira hodi badinas estuda atu prepara an ba futuru.
Portantu iha Munisípiu Likisá foti hosi estudante ensinu báziku kuatru ano, sestu ano no désimu primeiru ano hamutuk 629, maibé tanba mosu difikuldade iha prosesu konta bankária ne’e entaun foin mak estudante hamutuk 184 mak asesu ona konta bankária no sei falta 445 mak sei trata hela.
Jornalista : Tomé Amado
Editór : Cancio Ximenes
