DILI, 13 fevereiru 2023 (TATOLI) – Lakon iha Timor-Leste, mosu iha Macau. Ain-le’ut no dalan naruk ida ba eis-futebolista timoroan. Nia mak Francisco Araújo, atualmente hanesan treinadór iha Benfica Macau. Karreira ne’ebé agora nia iha nu’udar mós rezultadu husi esforsu naruk ida. Katak, antes hakat ba Macau – rejiaun autónoma espesiál Xina nian, sai ona treinadór iha klube futebol timoroan sira nian.
Karreira treinadór ‘paradu’, durante situasaun Covid-19, fó mós impaktu ba atividade futebol iha Timor-Leste sai paradu. Maske nune’e, Francisco Araújo nia esforsu la paradu, buka meiu seluk no konsege mosu iha Macau – rai ho lian ofisiál xinés no portugés, sai hanesan treinadór iha klube Benfica Macau.
“Ha’u-nia prosesu to’o iha Macau liuhosi eis-jogadór ida hosi klube Casa Portugal nu’udar klube portugés ida uluk iha primeira divizaun liga Macau. Nia hela kle’ur ona iha Timór. Nia mak Carlos Vilar nu’udar profesór iha International School iha Dili. Nia mak buka meiu hotu lori ha’u to’o mai iha ne’e”, Francisco dehan ba Agência Tatoli liuhosi WhatsApp, ohin.
Pozisaun ne’ebé daudaun ne’e, Eis-futebolista timoroan ne’e asume mak hanesan treinadór fíziku iha klubé ne’ebé harii iha 1951 ne’e, durante tinan ida, hahú husi 2023-2024.
“Ha’u mai kontratu nu’udar treinadór fíziku ba klube futeból Benfica Macau nu’udar preparadór fíziku, análiza tékniku ba seniór no Under (U-16-19) Akadémika Benfica Macau, kontratu primeiru ba tinan ida depois mak klube na’in sei haree ha’u-nia prestasaun, karik Benfica kampiaun iha tinan ida ne’e, ha’u iha posibilidade bele kontinua tan”, treinadór timoroan ne’e relata.
Esperiénsia foun ne’ebé eis-jogadór ne’e hetan iha Macau, la’ós hanesan ‘novidade’. Maibé, la fasil hanesan fó treinamentu ba jogadór sira iha Timor-Leste tanba iha klube foun ne’ebé nia haknaar aan bá, oras ka tempu ‘importante no prioridade liu’ durante treinamentu la’o no tenke kreativu halo atividade hotu.
“La fasil hanesan ita fó treinu iha Timor-Leste. Iha ne’e (Macau), ita funu primeiru kona-ba oras no planu programa no organizasaun treinu profisionál sura husi segundu ba minutu to’o oras; sura hotu kedas lakohi atu soe segundu ida. Língua komunikasaun: inglés, portugés. Importante liu mak kriativu dezeñu programa treinu utiliza aplikasaun IT. Iha ne’e, ema la dezeñu trinamentu manuál ona. Maibé, antes ha’u mai iha ne’e utiliza ona aplikativu sira ne’e iha Timór; ba ha’u la todan ida atu dezeña treinamentu nian”, nia konta.
Benfica Macau hanesan klube jigante iha nasaun Macau ne’ebé sai kampiaun dala lima tutuir malu bainhra promove hosi segunda divizaun iha tinan neen ba kotuk hanesan klube primeira divizaun hanesan mós klube primeiru Macau joga iha Champion Azia ne’ebé liu kualifikasaun grupu Asian Football Confederation (AFC).
Esperiénsia Francisco iha ‘mundu futeból’
Francisco Araújo envolve iha ‘mundu futeból’ hahú otas juvenil. Husi jogadór ba treinadór. Husi Timor-Leste to’o Macau. Istória naruk hahú karreira. Iha tinan 2008, nia envolve aan hanesan jogadór, iha Sentru Treinamentu Futeból Juvenil ne’ebé lideradu hosi treinadór Mr. Kim no asistente Agostinho Mesquita, Lorenço Apalo, no seluktan.
“Ha’u hahú treinu futebol iha Sentru Futeból Juvinil ne’ebé mak sei ezisti to’o agora. Esperiénsia joga ladun barak iha selesaun nasionál. Hamutuk ho Sentru Juvinil joga de’it iha Malazia 2008 no korea 2011. Iha 2010, ha’u simu konvite ida husi futeból Darwin hodi ba treinu no joga iha Cambera ho ekipa Northern Territory Darwin iha Institute of Sport Camberra,” nia konta.
Klube ne’ebé antes nia jog aba mak YMCA Comoro FC hahú tinan 2015 bainhira Liga Futeból Amadora (LFA) eziste no iha tinan 2017 Francisco labele kontinua joga tan ho nia amigo sira tanba nia hetan asidente durante jogu ho nune’e nia deside lakoi tan atu joga no prepara aan ba fali treinadór.
Iha tinan 2015 sei ativu joga iha klube YMCA, Timoroan ne’ebé agora sai treinadór fíziku iha diaspora ne’e, hasai ona nia kursu AFC hanesan treinadór ba lisensa D iha Dili no kaer kedan klube YMCA iha tinan 2015-2017.
Iha tinan 2018, hanesan asistente treinadór iha klube primeira divizaun Liga Futeból Timor – Leste (LFTL) Atletico Ultramar. Iha tinan 2019, nia muda fali ba klube Zebra FC hanesan treinadór prinsipál maibé la konsege halo remata jogu époka ida.
Ho nune’e nafatin iha tinan 2019 nia laran, nia fila hikas ba Atletico Ultramar hanesan treinadór prinsipál.
Iha tinan 2020, hanesan treinadór iha klube Assalam FC durante époka ida no hakur ba tinan 2021 klube Ponta Leste fó konfiansa ba nia hodi lidera fali klube ne’e durante époka ida no lori klube ne’e sai terseiru lugar iha liga.
Alende kaer klube, Francisco hanesan mós asistente ba selesaun nasionál nasionál U-19, iha ne’ebé nia pozisaun hanesan dezeñadór programa ba treinamentu no seluktan.
Ho esperiensia ne’ebé sufisiente fó kedan oportunidade ba Francisco iha tinan 2023 sai hanesan treinadór fíziku iha Benfica Macau.
Dadaun ne’e iha klube ne’ebé nia prezidente mak Leonel Alves ne’e, Francisco Araújo hanesan treinadór ho lisensa sertifikadu hosi AFC kategoria B, maski nune’e iha Macau loke oportunidade ba formasaun lisensa A, nia sei foti hodi halo kompleta nia lisensa.
Jornalista:Hortencio Sanchez
Editór : Zezito da Silva
