DILI, 28 fevereiru 2023 (TATOLI) – Klube primeira divizaun Benfica Macau kontrata tan jogadór timoroan hanesan mós kapitaun selesaun nasionál U-23, Filomeno Juniór da Costa atu reforsa klube ne’e durante liga époka ida.
“Ohin ha’u aranka ona hosi Timor-Leste ba Macau, to’o iha ne’ebá mak sira fó kontratu mai ha’u asina no ha’u joga ona iha ne’ebá durante époka ida”, jogadór ne’e dehan ba Agência TATOLI iha Aeroportu Internasionál Prezidente Nicolau Lobato, ohin.
Nia dehan, hanesan timoroan sente orgullu atu bele ba joga iha klube jigante ida iha Macau.
“Laos ha’u mesak mak ba joga iha klube ne’e maibé iha fulan kotuk jogadór João Pedro mós ba uluk ona, ha’u ba tan ami na’in rua mak sei joga iha ne’ebá hamutuk mós ho treinadór timoroan Francisco Araujo iha ne’ebá, hanesan timoroan ha’u sente orgullu tebes ba joga iha klube internasionál ne’e”, nia dehan.
Tuir nia, oportunidade ne’e loke dalan mós ba jogadór timoroan seluk atu esforsu makas hodi hatudu jogu ne’ebé di’ak atu hetan mós oportunidade hanesan ne’e.
Filomeno aranka ona ba Macau ho aviaun Air Azia ho númeru QZ959 sei liu hosi Malazia kontinua kedan ba Macau aban.
Esperiénsia iha mundu futeból
Filomeno Juniór moris iha Dili 21 juñu 1998 hahú kareira hanesan futebolista iha tinan 2010 to’o ohin loron.
Iha tinan 2016-2022 hanesan jogadór prinsipál iha klube AD SLB Laulara ne’ebé na’in mak lider Karismatiku Kay Rala Xanana Gusmão.
Bainhira hamutuk ho SLB Filomeno utiliza númeru kamijola 18 hanesan defeza sentrál no hanesan mós kapitaun ekipa.
Aleinde joga iha klube juniór hanesan mós jogadór selesaun nasionál ho númeru kamijola 18 kapitaun ba ekipa U-23 no seniór.
Iha tinan 2022 ba kotuk Juniór hamutuk ho selesaun nasionál konsege lori Timor-Leste sai terseiru lugar iha kopa ASEAN Football Federation (AFF) iha Kamboja.
Ho performe ne’ebé brillante halo klube internasionál Benfica Macau laran monu ba nia hodi kontrata ba époka ida.
Jornalista:Hortencio Sanchez
Editór : Zezito Silva
