BAUCAU, 03 marsu 2023 (TATOLI) – Primeiru-Ministru (PM), Taur Matan Ruak, vizita Fundasaun Lafaek Di’ak, klínika saúde komunidade Triloka, ne’ebé lokaliza iha postu administrativu Baucau Vila.
Iha vizita ne’e, Matan Ruak hatete Governu Daualuk ninia investimentu mak prioritiza ema no atu atinje ida ne’e iha buat importante tolu mak hakarak ema ne’ebé iha saúde di’ak no moris naruk; ema ne’ebé matenek, domina siénsia no teknolojia atubele atualiza nia matenek no akompaña dezenvolvimentu mundu nian; no tau-matan ba ninia kualidade vida, tanba moris presiza aumenta nia rendimentu.
“Se ita haree didi’ak iha aspetu kona-ba saúde nian, iha ligasaun ho atividade [klínika] tanba ita iha problema boot. Dahuluk mak ita-nia populasaun 47% sofre má nutrisaun, ne’e tanba mai hosi inseguransa alimentár. Ne’e kontribui boot ba kualidade ema iha ita-nia rain, tanba ne’e mak Governu kria programa barak para tenta ajuda kombate má nutrisaun, hanesan bolsa-da-mãe no programa sira seluk”, dehan.
Xefe Governu apresia esforsu profisionál saúde sira ne’ebé mak servisu iha Klínika Fundasaun Lafaek Di’ak tanba ne’e área ida ne’ebé ejize koñesimentu profisionál no kualifikadu para bele tau-matan ba ema.
“Ita bele iha rekursu umanu maibé rekursu finanseiru no infraestrutura laiha ne’e difikuldade boot, nune’e konsentrasaun Governu nian ba profisionál saúde. Ezekutivu nia polítika konsentra bá área rua importante mak medida preventiva no seluk mak kurativa”, nia esplika.
Xefe Ezekutivu rekomenda ba responsável klínika atu mantein koordenasaun di’ak ho ospitál Baucau, liuliu Ministériu Saúde liga ba serbisu fundasaun nian tanba falta rekursu entaun tenke halo jestaun di’ak hodi sustenta atividade iha tempu naruk.
Diretór Fundasaun Lafaek Di’ak, Gregório Lobo Pinto, lembra fundasaun kria iha tinan 1999 no iha 2005 reorganiza-aan hodi harii klínika iha Triloka ne’ebé hanaran Klínika Ambulatória no iha 2007 hamosu tan Klínika Maternu Infantíl.
“Momentu ne’ebá asina akordu ho Ministériu Saúde hodi serbisu hamutuk iha área ida ne’e. Klínika ne’e fó atendimentu ba komunidade iha suku Ostiku, Bukoli no Triloka”, katak.
Durante ne’e fundasaun hasoru problema barak, liuliu falta rekursu umanu no finanseiru, tanba laiha médiku espesialista no iha de’it mak funsionáriu hamutuk na’in-25 maibé laiha osan atu selu.
Fundasaun ne’e mós hetan ajuda hosi parseiru sira maibé bá hala’o de’it atividade no ba prosperidade empregadu sira-nian. Tanba ne’e, husu Governu atu disponibiliza médiku permanente hodi bele tulun fundasaun hodi fó tratamentu di’ak liu ba pasiente.
Iha tinan 2022, fundasaun hetan ajuda finanseira hosi Servisu ba Apoiu Sosiedade Sivíl no Auditoria Sosiál (SASCAS) hamutuk rihun $10. Osan ne’e hodi sosa ekipamentu saúde, medikamentu no selu transporte ba Klínika Móvel.
Jornalista: Antónia Gusmão
Editora: Maria Auxiliadora
