DILI, 05 abríl 2023 (TATOLI)—Xefe Bankada hosi Partidu Libertasaun Populár (PLP) iha Parlamentu Nasionál (PN), Deputadu Corneilo Gama ‘L7’, hateten nia-parte prontu kumpre desizaun saida de’it hosi PLP, tanba nia sai hosi PLP hodi ba hamutuk fila-fali ho partidu istóriku Fretilin.
‘’La ameasa, ha’u dehan ha’u-nia tinan to’o 78 ona, entaun ita tenke entrega podér ba foinsa’e sira kaer no prontu desizaun saida de’it. Ezemplu, sira iha ne’e dehan rezigna an uluk, maibé uluk funu la rezigna, agora funu hotu tiha mak rezigna, ne’ebé ha’u dehan ha’u-nia tinan to’o ona,” Deputadu L7 hateten ba Agência Tatoli iha PN, kuarta ne’e.
Razaun fila ba partidu istóriku ne’e tanba durante tinan 24 iha ai-laran liberta nasaun, depois nia parte harii partidu Unidade Nasionál Demokrátika Rezisténsia Timorense (UNDERTIM) no tama ba PLP agora tinan lima ona, entrega fali podér ba foinsa’e sira tanba kestaun idade.
Fretilin ne’e FALINTIL mak funda 1974-1975, entaun FALINTIL mak forsa Fretilin nian liberta nasaun, depois funu hotu tiha timoroan hetan liberdade.
Nune’e, atuál Deputadu hosi PLP ne’e deside sai hosi PLP besik mandatu ramata no fila ba partidu istóriku hanesan pesoal la’ós razaun ka intensaun ruma ba atu kandidatu sai Deputadu, membru Governu haree eleisaun parlamentár ne’ebé besik ona.
“Atu besik hotu mak sai. Ha’u ba Fretilin hanesan pesoál no la’ós atu kandidatu an atu sai Deputadu, maibé ba uma ida-ne’ebé ha’u tenke kontrola ha’u-nia istória desde prinsípiu 1975-1999, tur hamutuk rejiaun 1-3 hodi halibur malu konta istória funu nian durante ne’e.” Veteranu L7 hateten
Tan ne’e, nia hateten PLP ne’e mós Fretilin la’ós ema seluk nian tanba Taur Matan Ruak, Xanana Gusmão mós Fretilin, ne’ebé loos oinsá atu bele garante partidu hotu-hotu,” nia hateten.
Deputadu Cornelio Gama hanesan Deputadu iha lejislatura dalimak, nia mandatu hela fulan hira tan sei hotu no-nia parte sei la inísia hatama karta rezignasaun ruma ba meza PN.
“Ha’u la hasai ida, so ha’u mak hakerek bele, maibé lei ne’e dehan so na’in, evidénsia nusa mak hasai ema ne’e ka Deputadu ne’e tanba nia sala buat ruma,” nia dehan.
Entertantu, ba kestaun ne’e jornalista sira tenta konfirma ho terseiru Vise Prezidente PLP no Atuál Vise Prezidente Parlamentu Nasionál, Maria Angelina Sarmento, maibé seidauk bele fó komentáriu.
Jornalista : Nelson de Sousa
Editór : Cancio Ximenes
