OÉ-CUSSE 11 abríl 2023 (TATOLI) – Sekretariadu Tékniku Administrasaun Eleitorál (STAE), tersa ne’e fó-sai aviza liuhosi taka lista espozisaun eleitór sira iha sede suku 18 iha Rejiaun Administrativa Espesiál Oé-Cusse Ambeno (RAEOA), atu halo konfirmasaun molok partisipa iha eleisaun parlamentár.
“Atu informa ba eleitór sira hotu iha sub-rejiaun Oésilo, Pássabe, Nítibe no Pante Makasar, katak hahú iha loron-segunda, 09 to’o 16 abríl 2023, ekipa STAE sei taka sai lista espozisaun eleitór iha sede suku idak-idak, atu eleitór sira bele halo konfirmasaun,” Diretora STAE Oé-Cusse, Luiza da Costa, ko’alia iha RAEOA, tersa ne’e.
Nia hatutan, karik eleitór balun mak naran laiha lista jerál STAE nian, kartaun eleitorál lakon ka tohar inklui dadus ruma laloos, ekipa sei prepara formuláriu atu prienxe iha atualizasaun baze dadus.
“Ita-nia ekipa sira-ne’e maka brigadista sira agora destaka ona iha kada suku idak-idak atu halo atendimentu, ne’ebé brigada sira prepara no eleitór sira sei aneksa ho dokumentu komprovativu hodi prosesa fali atu hetan kartaun eleitorál atu partisipa iha eleisaun parlamentár tinan ne’e,” nia katak.
Diretora STAE esplika, atendimentu iha suku ba asuntu tolu, dahuluk, sei naran la eziste, eleitór iha obrigasaun aprezenta sertidaun RDTL ka billete identidade bele mós pasaporte válidu kópia tahan ida no orijinál.
Daruak, se kartaun eleitorál lakon karik, eleitór iha obrigasaun aprezenta karta deklarasaun hosi Polísia Nasionál Timor-Leste (PNTL), aneksa ho dokumentu sertidaun komprovativu sira, RDTL ka billete identidade bele mós pasaporte válidu kópia tahan ida no orijinál.
Ikusliu maka, sei kartaun tohar ka aat no presiza hadi’a naran no data ruma, eleitór iha obrigasaun aprezenta dokumentu komprovativu sira-ne’ebé mensiona iha leten.
Nune’e, durante ekipa tékniku halo atendimentu iha suku idak-idak, sei laiha atendimentu kona-bá eleitór foun no muda hela-fatin, tanba antes ne’e ekipa hala’o resenseamentu eleitorál iha kada sub-rejiaun sira.
Entretantu, dadús hosi STAE Oé-Cusse, daudaun ne’e rejista eleitór provizória bazea dadus 2022 hamutuk 53.153, komposta hosi mane 27.407 no feto 26.106, tanba dadus 2023 seidauk sinkroniza ho totál sentru votasaun 80 no estasaun votasaun 115 maka estabelese iha territóriu Oé-Cusse.
Notísia relevante : STAE identifika sentru votasaun balun iha Oé-Cusse seidauk iha fasilidade adekuada
Jornalista : Abílio Elo Nini
Editór : Evaristo Soares Martins
