OÉ-CUSSE 13 abríl 2023 (TATOLI) – Komisaun Nasionál Eleisaun (CNE, sigla protugés), kinta ne’e ensera ona atividade edukasaun sivíka kona-bá regra kampaña eleitorál, krime eleitorál no prosedimentu hato’o keixa no reklamasaun, nune’e atividade kampaña no eleisaun bele la’o pás no estabilidade iha Rejiaun Administrativa Espesiál Oé-Cusse Ambeno (RAEOA).
Atividade enseramentu ne’e realiza iha salaun parókia igreja Numbei, partisipa hosi estrutura rejiaun partidu polítiku no ekipa susesu sira, diretór no xefe departementu, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), lideransa komunitária, sosiedade sivíl, grupu arte-marsiál, estudante no komunidade.
Notísia relevante: CNE hala’o edukasaun sívika ba komunidade Pante Makasar
Diretór CNE Oé-Cusse, Tomás Oqui Meta, informa, atividade edukasaun sívika, realiza ona iha fatin neen kobe ba sub-rejiaun Oésilo, Pássabe, Nítibe no ensera iha Pante Makasar. Ho obetivu atu hasa’e koñesimentu eleitór sira atu hodi hasa’e taxa partisipasaun iha loron eleisaun no minimiza krime eleitorál.
“Primeiru ami esforsu atu hasa’e taxa partisipasaun, ne’ebé iha edukasaun sívika ne’e ami enkoraja eleitór sira, oinsá ita hotu lori família sira atu tuir votasaun iha loron eleisaun, nune’e nia rezultadu bele di’ak, no husu entidade hotu atu kontribui pás no estabilidade iha ámbitu kampaña eleitorál no eleisaun parlamentár,” Tomás Oqui Meta ko’alia iha salaun Igreja Numbei Oé-Cusse.
Komandante PNTL Rejiaun Oé-Cusse, Superintendente Xefe Polísia, Mateus Mendes Assunção, apela ba estrutura partidu polítiku no joven sira atu kontribui hametin pás no estabilidade iha rejiaun Oé-Cusse, durante períodu kampaña eleitorál no loron eleisaun.
“Ha’u husu ba estrutura partidu polítiku sira iha Oé-Cusse, ita-boot sira-nia papél iha edukasaun sívika ne’e importante, tanba partidu mak sei enkoraja no orienta militante no simpatizante atu la’o-tuir ita-hotu ninia espetativa,” nia fó hanoin.
Komandante PNTL ne’e apela ba inan-aman no joven no grupu arte-marsiál sira, atu kumpre regra kampaña eleitorál, fó liman ba malu, evita krime eleitorál no mós persiza hatete prosedimentu hato’o keixa, nune’e mak bele evita perturbasaun iha festa demokrasia ne’e.
Notísia relevante: PR Horta husu líder polítiku hala’o kampaña hato’o programa ba povu
Jornalista : Abílio Elo Nini
Editór : Evaristo Soares Martins
