DILI, 18 abríl 2023 (TATOLI) – Diretór Nasionál Saúde Publika, Frederico Bosco, informa durante semana daruak iha fulan abríl, Ministériu Saúde rejista kazu dengue foun hamutuk 121, hosi hirak ne’e na’in-rua lakon vida.
“Iha fulan abríl to’o horseik ita rejista kazu dengue 121, husi ne’e mate rua, Dili ida no Liquiça ida, nain-rua ne’ebé mak mate ho labarik idade tinan lima mai kraik”, Frederico Bosco dehan ba TATOLI, ohin.
Nia dehan, kazu dengue sira ne’e mai husi Munisípiu Dili, Lautem, Baucau, Bobonaro, Ermera, Liquiça no Viqueque.
Tanba ne’e, MS mantein ho intervensaun ho métodu konvensionál ne’ebé mak iha, halo promosaun edukasaun, advokasia envolve mós lideransa komunidade atu bele apoia iha medida preventiva sira, tantu iha komunidade uma-kain ida-idak, inklui mós medidas kuidadu pesoál individu sira.
“Medida báziku liu mak presiza hamoos ita-nia ambiente, tenke livre husi lixu, livre husi fatin ne’ebé bee nalihun, frekuénsia udan kontinua nafatin, ida ne’e prejudika tebes afeta ba populasuan sira”, nia dehan.
Entertantu, husi janeiru to’o abríl, MS rejista ona kazu dengue hamutuk 741 no óbitu lima.
Jornalista : Felicidade Ximenes
Editór : Zezito Silva
