DILI, 28 abríl 2023 (TATOLI) – Diretór Nasionál Farmasia no Medikamentu iha Ministériu Saúde Delfim Ferreira, rekorda Ministériu Saúde iha tinan 2022, haruka aimoruk item lima ba Laboratóriu Therapiutic Goods Administration Austrália hodi teste nia kualidade maibé aimoruk ampicilin ho rezultadu pozitivu no haat seluk sei prosesu teste nia-laran.
“Aimoruk ne’ebé ita haruka iha fulan setembru 2022 mak hanesan bisoprolol, Glibenclamide, Oxytocin, Aspirin no Ampicilin husi aimoruk sira ne’e ida de’it mak rezultadu pozitivu, haat seluk sei prosesu teste nia-laran tanba la’os ita de’it mak lori aimoruk ba maibé husi nasaun pasífika sira mós teste hotu iha ne’eba”, Delfim Ferreira dehan iha nia kna’ar fatin Caicoli, ohin.
Nia dehan, aimoruk ne’ebé pasa ka fó rezultadu pozitivu mak ampicillin, entaun ida ne’e di’ak ba pasiente sira atu konsumu.
Aimoruk item lima ne’ebé teste iha Austrália ne’e foti amostra husi klínika privada no mós SAMES.
“Aimoruk ampicilin ne’e aimoruk antibiótiku, entaun bainhira rezultadu sai ita orienta ba Servisu Autonómu Medikamentu no Ekipamntu (SAMES) atu halo distribisaun ba fasilidade saúde sira no ita mós husu ba klínika privada sira atu faan fila fali aimrouk ne’e tanba iha kualidade.
Aleinde ne’e iha tinan 2021, Ministériu Saúde asina ona akordu ho Governu Austrália atu halo teste ba kualidade aimoruk bainhira iha deskonfia ruma.
Jornalista : Felicidade Ximenes
Editór : Zezito Silva
