DILI, 16 maiu 2023 (TATOLI)—Komisaun Juridisaun Nasionál hosi partidu KHUNTO, tersa ne’e, hato’o ona keixa formál ba Ministériu Públiku (MP) kona-ba polémika sidadaun Indonézia na’in-rua asesu kartaun eleitorál Timor-Leste nian.
Notísia Relevante: CNRT keixa sidadaun Indonézia asesu kartaun eleitorál ba MP
“Ohin, mai iha ne’e hato’o keixa hasoru sidadaun Indonézia na’in rua ho kuadru CNRT, tanba hosi partidu CNRT ne’ebé mak iha 11 maiu 2023 komísu kampaña iha Maliana sidadaun na’in-rua mai hosi Indonézia deklara katak, partidu KHUNTO mak fasilita no emite sira-nia pasaporte hodi sira mai iha ne’e, tanba ne’e ami diskorda ami mai iha ne’e hodi hato’o keixa,” Jurista Partidu KHUNTO, Arnaldo da Costa Lopes, hateten ba jornalista sira hafoin aprezenta keixa refere ba Ministéiru Públiku iha Matadouro, Dili.
Keixa ne’e, kontra kuadru CNRT tanba iha ne’eba espalla imputa (atribui) ba KHUNTO tanba nia fasilita no emite pasaporte ba ema sidadaun Indonézia, maibé kompeténsia ba ida-ne’e so STAE ho Ministéiru Justisa liuhosi Notariadu.
“Partidu KHUNTO sente prezudikadu, nune’e keixa ne’e aprezenta mós evidénsia hodi hato’o ba Ministéiru Públiku mak iha kompeténsia atu instaura prosesu, sé mak sai autór prinsipál ba aktu ne’e,” nia hateten.
Nia hateten, tuir prosesu judisiál hafoin aprezenta keixa durante prazu loron 60, hafoin ne’e prokuradór mak hanesan na’in titulár penál prosesa tuir mai.
Partidu KHUNTO mós, iha segunda (15 maiu 2023), hato’o ona keixa ba Komisaun Nasionál Eleisaun (CNE, siglá portugés) ho Komandu Jerál PNTL oinsá liña hamutuk hodi asegura sidadaun na’in-rua bele deskobre lia-loos no hatuur justisa ho loloos, sé mak fasilita hodi falsifika dokumentu sidadaun estranjeiru.
Notísia Relevante: CNRT-KHUNTO husu investiga sidadaun Indonézia ne’ebé asesu kartaun eleitorál iha Bobonaro
Jornalista : Nelson de Sousa
Editór : Cancio Ximeneseste
