DILI, 16 maiu 2023 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, apela ba sidadaun ka eleitór sira hotu iha rai-laran no rai-li’ur atu bele partisipa eleisaun parlamentár iha loron 21 fulan-maiu 2023.
Notísia Relevante: STAE distribui materiál sensitivu no la sensitivu ba munisípiu no diáspora
“Dala ida tan, hanesan ita hotu hatene sei realiza dala ida tan eleisaun, eleisaun ida importante Parlamentu ninian, husu ba sidadaun ou eleitór hotu-hotu tantu iha rai-laran no rai-liur atu bele hakat ba iha sentru votasaun ida-idak tuir ita-boot sira-nia unidade jeográfika ne’ebé kontempla iha kartaun eleitór atu bele ezerse ita-boot sira-nia direitu votu hahu hosi tuku 07h00 dadeer ba to’o iha tuku 15h00 lorokrai,” Diretór Jerál STAE ne’e hateten ba jornalista sira iha nia kna’ar fatin, Caikoli, Dili, tersa ne’e.
Nune’e, nia husu atu partisipa ho másimu atu nune’e eleisaun parlamentár ne’e bele iha taxa partisipasaun ne’ebé mak aas kompara ho eleisaun sira liu ba ne’e.
Diretór STAE ne’e apela mós ba sidadaun hotu iha ne’ebé de’it atu kontribui ba pás no estabilidade, atu nune’e ita nia festa demokrásia bele to’o rohan ho di’ak.
“Tanba daudaun ne’e iha ita-nia rai hosi entidade oioin nasionál no internasionál ne’ebé mak akompaña hela ita-nia prosesu, entaun pás no estabilidade importante atu nune’e sidadaun ka eleitór ida-idak bele hakat ba sentru votasaun sira ho seguru atu bele fó eskolla tuir ninia konxiénsia rasik,” nia hateten
Nune’e, tuir nia, festa demokrásia ne’e kontinua la’o ho armónia hodi kontribui imajen Timor-Leste iha rejiaun no mundu.
Nia mós hato’o ba komunidade ka eleitór ne’ebé uluk vota tiha ona iha sentru votasaun paralelu iha Dili, ba tinan ne’e sei la implementa medida sentru votasaun paralelu, nune’e husu antes loron ida ka rua atu fila ba ida-idak nia munisípiu.
Notísia Relevante: Prezidente Repúblika dekreta loron eleisaun Parlamentár iha 21 maiu
Jornalista : Nelson de Sousa
Editór : Cancio Ximenes
