DILI, 21 maiu 2023 (TATOLI)-Konsilleiru Superiór, Partidu Kmanek Haburas Unidade Nasionál Timor Oan (KHUNTO), José dos Santos Naimori Bucar, hateten, hanesan Konsilleiru Superiór Partidu KHUNTO simu rezultadu saida mak povu fó ba KHUNTO iha eleisaun parlamentár tinan ne’e, tanba demokrasia ne’e mai hosi povu.
“Ba ami, ha’u ho Prezidente Partidu KHUNTO atu fó mensajen ba hotu-hotu la’ós ba partidu KHUNTO maibé hotu-hotu, ne’ebé mak manán, ne’ebé maka lakon ita hotu hotu nian, ne’e la signifika katak ida lakon atu ba ne’ebé, ida manán ba ne’ebé. Hotu hotu kontribui ba pás, kontribui dezenvolvimentu ema hotu nian moris di’ak. Ita hotu sempre manán. Laiha ida mak lakon, povu mak sei fó julga, desizaun hotu hosi povu,” José dos Santos Naimori Bucar hateten ba jornalista sira hafoin ramata ezerse votu iha sentru votasaun Soro-Kraik, Ainaro Vila, Munisipiu Ainaro.
Nia dehan, loron 21 maiu hotu hotu mai hola parte iha sentru votasaun fó sira nian direitu ba iha festa demokrasia hodi ezerse ba votu hodi hili partidu ida
“Nu’udar sidadaun ita hotu-hotu solidadridade atu hato’o ita-nia votus ba iha partidu ida hosi votu ne’e ho afirmsaun ida katak hotu hotu hakarak maka timoroan hotu hamutuk moris iha situasaun ne’ebé hakmatek atu nune’e ita-nia festa ne’e bele la’o ho di’ak, ema hotu hakmatek,” nia afirma.
Naimori hateten, buat ne’ebé halo iha kampaña eleitorál durante fulan idalaran ita haluhan tiha.
“Ita hotu-hotu haree ba oin, hodi lori nasaun ne’e ba oin, hodi prepara ba povu no rai ida ne’e, prioridade saida mak ba Polítiku-na’in sira atu halo, hodi nune’e dezenvolve povu nia moris para povu bele hetan moris di’ak ba futuru,” Nia dehan.
Entretantu, Konsilleiru Superiór partidu KHUNTO José dos Santos Naimori Bucar, hamutuk ho Prezidente KHUNTO Armada Berta dos Santo no atuál Vise Primeiru-Ministra ne’ebé akompaña hosi nia Xefe Gabinete Marito Magno ezerse sira-nia nia votu iha sentru votasaun Soro-Kraik, Ainaro Vila, Munisípiu Ainaro hahú tuku 8:00 dadeer ne’e.
Jornalista: Natalino Costa
Editór: Rafael Ximenes de A. Belo
