VIQUEQUE, 06 juñu 2023 (TATOLI)—Ministériu Solidariedade Sosiál no Inkluzasaun (MSSI), tersa ne’e, lansa pagamentu ‘bolsa da mae jerasaun foun’ ba labarik ho idade 0-3 iha munisípiu Viqueque.
Diretór Jerál Administrasaun Finansa hosi MSSI, Rui Manuel Gago Exposto, esplika, programa ne’e ho intensaun halo redusaun ba pobreza, má nutrisaun, rais badak no iha tempu hanesan bele estimulu ekonomia família nain.
“Benefisiáriu sira simu direitu ne’e ba fulan-marsu, ne’ebé halo rejistrasaun iha 28 fevereiru to’o iha marsu. Tuir dekretu-lei númeru 22/2021 kona-ba bolsa da mãe jerasaun foun dehan katak depois rejistu fulan-ida maka benefisiáriu foin simu direitu subsísidiu ba inan isin-rua no labarik. Depois lansamentu ne’e, benefisiáriu sira sei simu fulan-abríl nian, maibé ba pagamentu ita sei halo regulár no dala-ruma ita-nia pagamentu tarde iha sistema,” Diretór informa ba Agência Tatoli, iha Sentru Saúde Viqueque Vila.
Pagamentu liuhosi operadór telekomunikasaun Telemor liuhosi programa Mosan.
“Bazeia ba kontratu ne’ebé ami halo ho empreza Telemor, katak sira sei halo pagamentu iha fasilidade saúde iha munisípiu Viqueque totál hamutuk 49,” nia akresenta.
Notísia relevante : Governu realiza abertura pagamentu “bolsa da mãe jerasaun foun” iha Covalima
Biban ne’e, nia husu ba inan isin-rua sira tenke halo konsulta regulár kada fulan tuir kalendáriu hosi pesoál saúde sira fó ba inan isin-rua.
Tuir dadús munisípiu Viqueque hahú halo lansamentu pagamentu ba programa nasionál ne’e iha loron 28 fevereiru to’o 31 maiu.
“Ita rejista totál benifesiáriu inan isin-rua no labarik hamutuk 4.000 no faze pagamentu ba marsu nian hamutuk 2.000 resin, maibé inan balun númeru telemóvel la ativu,” nia tenik.
Durante serimónia lansamentu pagamentu ne’e, ekipa responsável simbolikamente entrega pagamentu ba benefisiáriu hamutuk 37
Iha biban hanesan, Administradór munisípiu Viqueque, Januário Soares ‘Bolly’, husu ba inan aman sira ne’ebé simu subsídiu tenke uza osan ho didi’ak no labele uza ba buat seluk.
“Programa Governu nian ne’ebé loke direitu bolsa da mãe ba inan isin-rua no labarik sira iha munisípiu Viqueque sai hanesan investimentu boot ba jerasaun sira iha futuru, nune’e ha’u husu ba família sira uza osan ba oan sira, labele uza ba jogu ruma. Ha’u espera liuhosi programa sira ne’e bele ajuda inan isin-rua no labarik sira hasa’e nutrisaun iha isin,” nia tenik.
Jornalista : Vitorino Lopes da Costa
Editora : Julia Chatarina
