OÉ-CUSSE, 20 juñu 2022 (TATOLI) – Servisu Edukasaun Rejiaun Administrativa Espesiál Oé-Cusse Ambeno (RAEOA), daudaun ne’e implementa ona programa merenda eskolár faze dahuluk ba ba loron 52 iha períodu 2023.
Diretór Edukasaun Oé-Cusse, Daniel Mauno, informa, molok implementa, parte edukasaun konvida fornesedór no koordenadór eskola sira, realiza enkontru kona-bá mekanizmu implementasaun iha kada eskola, hodi esplika manuál ezekusaun orsamentu ba programa merenda eskolár.
“Merenda eskolár ne’e hahú ona horisehik ba ensinu báziku sira, no ensinu pré-eskolár hahú ona iha semana kotuk, Estadu agora hasa’e ona osan, ita-nia esperansa ne’e, atu labarik hetan isin saudável, hasa’e nia todan no nutrisaun, ida-ne’e maka objetivu prinsipál ba programa merenda eskolár, tán ne’e ita bolu uluk ba pré-eskolár no iha sesta semana kotuk ita bolu tán ensinu báziku atu fahe osan ba programa merenda eskolár,” Daniel Mauno, ko’alia iha Oé-Cusse, tersa ne’e.
Daniel Mauno esplika, antes ne’e edukasaun submete proposta orsamentu propoin kedas ba tinan tinan ida nian, hodi koloka ba nesesidade merenda eskolár nian, no implementa faze dahuluk ba loron efetivu 52 ba profesór sira atu hala’o, no sei remata iha fulan-agostu 2023 ne’e.
“Maibé kuandu remata, kada eskola sei submete relatóriu depois ita prosesa tán loron efetivu tuir mai, programa ne’e implementa hahú hosi ensinu báziku ba eskola hotu-hotu no pré-eskolár eseptu eskola privada sira hanesan Katólika,” nia katak.
Koordenadora Eskola Bázika Filiál (EBF) 28 Agostu, Deneti Alves, hateten, ai-haan ne’ebé eskola fornese ba kada estudante sentavu $0,42 ho iha item rua, ai-haan protesaun no ai-haan haburas.
“Ohin hanesan loron daruak, ai-haan sira-ne’ebé maka fornese ai-haan protesaun no ai-haan haburas, hanesan etu, na’an, mantolun, ikan modo-tahan no aidila-fuan, ai-fuan,” nia esplika.
Alvu ba programa merenda eskolár ne’e estudante hamutuk 18.691 komposta hosi ensinu báziku 17.980 no pré-eskolár 711 mai hosi pré eskolár públika 12 iha territóriu Oé-Cusse ho totál orsamentu hamutuk millaun $1-resin.
Notísia relevante: Edukasaun Oé-Cusse propoin millaun $1-resin ba programa merenda eskolár
Jornalista : Abílio Elo Nini
Editór : Evaristo Soares Martins
