DILI, 27 juñu 2023 (TATOLI) – Plan Internasionál implementa Programa Edukasaun Sedu ba Labarik sira liuhusi konkretizasaun Biblioteka Hale’u iha munisípiu Aileu no Ainaro ho alvu ba grupu komunidade 20 hodi haforsa estimulasaun sedu ba labarik.
Biblioteka Hale’u ne’e atu tulun labarik sira ne’ebé sei iha komunidade nia leet atu atrai sira oinsá iha vontade atu aprende. Daudaun iha ona benefisiáriu 6.048, kompostu husi feto 3.370 no mane 2.678 ne’ebé maka asesu ona biblioteka refere.
“Ita kria Biblioteka Hale’u ne’e ho objetivu atu hasa’e kultura lee ba labarik no komunidade sira, liuhusi fó empresta livru ba sira atu lori bá uma depois hetan tulun husi inan no aman sira atu ajuda lee ba sira hodi rona, loke sira-nia memória bainhira tempu sira hakat bá edukasaun pré-eskolár bele iha ona koñesimentu”, Diretora-Ezekutiva Interina Plan Internasionál, Fátima Estrela Soares, dehan ba Tatoli, ohin.
Nia esplika Biblioteka Hale’u ne’e uza karreta haat kompleta ho materiál didátiku sira inklui livru oioin liu 100 no iha mós televizaun ne’ebé maka durante ne’e loke hodi apoiu labarik husi tinan lima mai kraik.
Kriasaun Biblioteka Hale’u iha Aileu no Ainaro ne’e bazeia ba peskiza ne’ebé Plan halo iha kada munisípiu sira katak ekipamentu atu ajuda komunidade sira la adekuadu. Tanba ne’e, Plan deside hamosu Programa Edukasaun Sedu, liuhusi Biblioteka Hale’u ne’e atu tulun komunidade ninia oan sira ho idade ki’ik atu asesu sedu bá edukasaun.
Aléinde apoiu livru ba labarik sira, Plan mós loke sesaun ida ho inan no aman sira tanba iha konseitu Timor-Leste nian, koñesimentu ekarregadu sira-nia kona-ba dezenvolvimentu labarik nian sei menus.
Nune’e, Plan kria matadalan ida ne’ebé hanaran kurríkulu parentidade di’ak ne’ebé iha sesaun ida Plan halo ho inan-aman sira atubele akompaña oan sira-nian dezenvolvimentu kakutak liuhusi aprende lee. Tanba idade labarik sira-nian husi tinan 5 mai kraik ne’e presiza hetan akompañamentu hodi halo esplikasaun ba sira bainhira mosu pergunta husi sira.
Implementasaun atividade ne’e liuhusi kooperasaun entre Ministériu Edukasaun, Juventude no Desportu no Plan Internasionál oinsá atu haree ba intervensaun ne’ebé diferente kona-ba edukasaun ba labarik, liuhusi Biblioteka Hale’u ho ekipamentu ne’ebé adekuadu.
Aléinde programa kriasaun Biblioteka Hale’u iha munisípiu rua ne’e, Plan mós iha programa seluk hanesan haforsa eskola seguru ho komprensivu husi jestaun risku dezastre iha nivel eskola no promove eskola reziliénsia ba mudansa klimátika no impaktu ba dezastre.
Depois promove área protesaun ba labarik zero violénsia iha eskola no redús violénsia bazeia ba jéneru iha eskola, nomós haree kona-ba polítika fila hikas bá eskola. Plan mós promove modelu no nutrisaun no parentidade di’ak ho inan-aman no estudante sira iha eskola, liuhusi implementasaun kurríkulu parentidade pozitivu no nutrisaun ne’ebé komprensiva maka sei integra hodi haree mós kona-ba ijiene inklui haree kona-ba sistema bee-moos iha eskola.
Plan mós haforsa programa koñesimentu estudante, profesór no inan-aman sira-nian kona-ba saúde reprodutiva. Hakarak mós haforsa lideransa estudante sira-nian atu lidera rasik atividade liuhusi konsellu estudantíl ne’ebé maka eziste ona iha eskola sira.
Programa sira ne’e rasik Plan sei realiza ho ninia durasaun tempu tinan lima haree husi tempu ba governasaun ida nian, nune’e bele ajuda labarik sira iha territóriu. Husi programa ne’e rasik, Plan konsege realiza ona ba eskola hamutuk 30 iha territóriu.
Programa sira ne’ebé Plan kria ne’e iha ninia orsamentu rasik ba kada tinan besik millaun $1. Verba sira ne’e mai husi Plan no apoiu husi doadór sira mak hanesan UNICEF, DIFAT Austrália no Uniaun Eropeia.
Jornalista: Tomé Amado
Editora: Maria Auxiliadora
