DILI, 28 juñu 2023 (TATOLI)—Sekretaria Estadu Formasaun Profisionál no Empregu (SEFOPE) liuhosi programa Mobilidade Laboral Japaun (MLJ) selesiona joven na’in-12 halo Technical Intern Trainer (TIT) ka halo estájiu , nu’udar etapa dahuluk serbisu iha Japaun.
Koordenadór Traballadór Timor-Leste ba Japaun, Gilberto Soares Pinto, hateten, preparasaun ba programa MLJ hosi inísiu mak halo rekrutamentu dahuluk ba joven 64 hosi sentru formasaun haat, maibé hosi númeru ne’e konsege selesiona de’it na’in-12.
“Hosi númeru 12 ne’e ita sei haruka uluk joven na’in-ualu (feto lima no mane tolu) bá Japaun iha fulan-jullu tanba sira kompleta ona dokumentu no asina ona kontratu, hein de’it sira-nia billete empregadór haruka mai, sira bele bá ona. Etapa tuir mai na’in-haat sei haruka iha setembru 2023. Ho ida-ne’e mak ohin ita bolu sira mai ko’alia preprasaun atu bá nian,” Koordenadór Traballadór informa ba Agência Tatoli, iha resintu edifísiu SEFOPE, Caicoli, kuarta ne’e.
Notísia relevante : Japaun instala ona sentru saúde foun iha Uaimori
Joven hirak ne’e sei halo estájiu ho durasaun tinan-ida to’o tinan-tolu iha setór agrikultura.
“Sira na’in-ualu ne’ebé hetan ona oportunidade bá serbisu iha Japaun, iha empreza lima iha setór ahrikultura hotu hanesan Matsuura Tsuyonari, Morisawa Hirofumi, Kusunose Shiki, Ikeichi Saikaen no Matsumura Kazutaka,” nia akresenta.
Nune’e, bainhira to’o iha Japaun, ajénsia Kochi Agrifarm mak foti joven timor-oan selesionadu hodi desloka bá fatin estájiu empreza lima.
Tuir kontratu ne’ebé joven hirak ne’e asina, kada ema sei simu ¥60.000 ($1.000 resin) ba fulan-ida.
“Ita konsidera sira ne’e la’ós traballadór maibé estájiu . Durante sira halo serbisu iha ne’ebá ita garante sira-nia seguransa tanba ita iha ona akordu ho ajénsia atu tau-matan ba sira,” Koordenadór tenik.
Iha fatin hanesan, Diretór Jerál SEFOPE, Paulo Alves, informa, SEFOPE iha tempu badak sei konvida Embaixadór Japaun partisipa iha serimónia despedida estajiáriu molok sira desloka bá Japaun.
“Joven na’in-12 (feto neen no mane neen) selesionadu maihosi sentru formasaun haat hanesan Sentru Mirai Sato Suai, Sentru Quesadhip Ruak, Sentru Santa Rafaela Bebonuk no Young Men’s Christian Association (YMCA),” nia relata.
Nune’e mós, Kandidatu TIT, Maria Correia, sente kontente tanba bele hetan oportunidade bá serbisu iha Japaun tanba molok to’o faze finál, hasoru difikuldade barak tanba lian Japaun difísil tebes.
“Maski ho difikuldade sira ne’ebé iha, ami esforsu duni tanba iha vontade atu apreende. Agora ami preparadu ona, hein de’it emreza haruka tiket mai, ami bá ona,” nia adianta.
Jornalista : Arminda Fonseca
Editora : Julia Chatarina
