BAUCAU, 13 jullu 2023 (TATOLI) – Kompañia responsável konstrusaun finaliza ona edifísiu foun Sentru Dezenvolvementu Komunitária (CDC) Baucau.
Diretór CDC munisípiu Baucau, Vicente Matos Belo, esplika, edifísiu refere kompañia responsável finaliza iha fulan-juñu, hafoin hahú konstrusaun iha fulan-setembru tinan-2023 liuhosi ajudu orsamentu Sekretaria Estadu Formasaun Profisionál Empregu (SEFOPE).
“Ita hein koordena ho Sekretáriu Estadu iha inísiu fulan-agustu,” Diretór Sentru Dezenvolvementu Komunitária ba Agência TATOLI iha Vila Antiga, kinta ne’e.
Edifísiu refere konstrui hosi kompañia L-Three unipesoal, Lda ho totál orsamentu rihun $91.566,14 liuhosi Diresaun Nasionál Formasaun no Profesionál (DINAFOP), SEFOPE atu konstrui edifísiu ida no sala aula rua durasaun kontratu to’o fulan-maiu tinan-2023.
Vicente Belo konsidera ho konstrusaun refere bele ajuda ona sentru refere atu halao atividade formasaun lian Korea no Agrikultura ba formandu sira-ne’ebé daudaun ne’e hala’o formasaun iha CDC.
“Agora ami seidauk utiliza maibé bele ona ajuda prosesu aprendizajen,” Vicente Belo akresenta.
CDC rasik atuál rejista formandu sira hamutuk na’in-52 ne’ebé hala’o kursu iha área agrikultura no lian Korea ne’ebé tuir planu sei gradua hafoin remata serimónia inaugurasaun edifísiu foun refere.
Jornalista : Natalino
Editór : Evaristo Soares Martins
