OÉ-CUSSE 20 jullu 2023 (TATOLI) – Estudante na’in-hitu hosi Rejiaun Administrativa Espesiál Oé-Cusse Ambeno (RAEOA), hetan opurtunidade asesu bolsa estudu hodi kontinua hala’o estudu iha Universidade Timor (UNIMOR) iha distritu Timur Tengga Utara (TTU), provínsia Nusa Tenggara Timur (NTT), Repúblika Indonézia.
Tan ne’e, iha kinta ne’e, Embaxadór Repúblika Indonézia (KBRI) ba Timor-Leste iha Oé-Cusse, Bonifasius Agung Nugroho, realiza enkontru ofisiál ho Prezidente Autoridade RAEOA, hodi informa ba Autoridade sira, tanba estudanate na’in-hitu ne’e sei hahú prosesu aprendizajen iha fulan-agostu 2023 ne’e.
“Ohin ami mai hasoru Prezidente Autoridade, hodi informa informasaun kona-bá prosesu simu estudante foun na’in-hitu hosi Oé-Cusse, hetan oportunidade bolsa estudu iha UNIMOR, ida-ne’e rezultadu hosi feira edukasaun ne’ebé realiza iha maiu liubá, tan ohin ami mai informa katak, feira edukasaun ne’e, sei iha nia kontinuasaun ba futuru,” Bonifasius Agung Nugroho, ba jornalista sira hafoin realiza enkontru ofisiál ho Prezidente Autoridade RAEOA.
Notísia relevante: KBRI hasoru PA RAEOA diskute setór rua loke bolsa estudu ba edukasaun no saúde
Diplomata Indonézia ne’e reafirma, estudante na’in-hitu ne’e fiksa ona, tanba daudaun ne’e Timor-Leste iha problema kona-bá pasaporte, tán ne’e iha oportunidade, hodi informa ba Autoridade RAEOA, sei bele, sira na’in-hitu tau atensaun sériu ba sira-nia dokumentu pasaporte, tanba iha agostu ne’e sira bele hahú ona prosesu aprendizajen iha Indonézia.
“Ohin ami informa, ami husu apoia ba Autoridade RAEOA sei bele fó apoia no fasilita oinsá, sira na’in-hitu bele asesu pasaporte, tanba sira na’in-hitu ne’e, balu sei estuda ba setór saúde liu-liu enfermeira, balu iha setór edukasaun no balu iha ekonomia,” nia katak.
Nia fó sai katak, prosesu bolsa estuda estudu ne’e realiza iha maiu 2023, liuhosi feira edukasaun, iha faze inisiu simu estudante rejista hamutuk na’in-39, depois na’in-11 mak pasa iha faze daruak iha rezultadu finál na’in-hitu ne’e maka hetan valór di’ak.
Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, agradese tanba tanba iha kooperasaun di’ak, Oé-Cusse oan bele hetan opurtunidade hodi kontinua estudu iha Indonézia.
“Hosi KBRI iha Oé-Cusse hasoru Autoridade, sira informa, katak, estudante na’in-hitu hosi Oé-Cusse oan, liu hetan bolsa estudu atu kontinua estuda iha universidade UNIMOR iha distritu Kefamenanu, entaun ne’e informasaun di’ak, hosi parte RAEOA ami kontente no agradese ba kooperasaun ida-ne’e,” Arsénio Bano orgullu.
Notísia relevante: KBRI realiza feira esdukasaun iha Oé-Cusse
Jornalista: Abílio Elo Nini
Editór: Evaristo Soares Martins
