OÉ-CUSSE 11 maiu 2023 (TATOLI) – Embaixada Repúblika Indonézia (KBRI, sigla indonezia) iha Timor-Leste, kinta ne’e realiza feira edukasaun iha Rejiaun Administrativa Espesiál Oé-Cusse Ambeno (RAEOA), ne’ebé partisipa hosi universidade 15 hosi Indonézia no fó oportunidade ba Oé-Cusse oan sira bele hetan bolsa estudu.
Notísia relevante: KBRI hasoru PA RAEOA diskute setór rua loke bolsa estudu ba edukasaun no saúde
Atividade feira edukasaun ne’e realiza durante loron rua, hahú kinta to’o sesta (11-12/05), realiza iha otél Ambeno Oé-Cusse.
Embaixadór Repúblika Indonézia (RI) iha Timor-Leste, Okto Dorinus Manik, esplika, feira edukasaun ne’e realiza ho pontu prinsipál rua, ho objetivu hametin relasaun bilaterál entre Timor-Leste ho Indonézia.
“Ohin ne’e momentu importante, ita-nia hamutuk bele reforsa tán relasaun bilaterál nasaun rua nia amizade, tanba ho atividade ne’e iha pontu rua maka importante iha feira ne’e,” Okto Dorinus Manik, ko’alia iha ámbitu abertura feira edukasaun ne’e iha otél Ambeno.
Diplomata Indonézia ne’e, informa, pontu dahuluk, feira ne’e sai istória ba Indonézia tanba foin dahuluk realiza iha Oé-Cusse, no iha eventu ne’e mós hetan partisipasaun mai hosi akadémiku sira iha universidade 15 hosi Indonézia.
Liuhosi atividade ne’e bele sei fó oportunidade ba estudante Oé-Cusse oan sira, atu hili ba futuru bele kontinua sira-nia estudu no bele hetan bolsa estudu.
Pontu daruak, eventu ne’e sai hanesan ponte ba kolaborasaun ba Governu Indonézia no Timor-Leste, espesialmente iha Oé-Cusse, tanba prioridade liu ba Oé-Cusse oinsá investe iha rekursu umanu.
“Ha’u hanoin, ho prezensa universidade sira-ne’e, bele motiva liután ita-nia kooperasaun serbisu hamutuk hodi haforsa rekursu umanu iha Oé-Cusse, la’ós bolsa estudu de’it, maibé iha kooperasaun seluk tán, bele promove ideia manorin, tán ne’e ha’u esperu, ho feira ne’e oportunidade ba nasaun rua nia kooperasaun oinsá kualifika rekursu umanu,” nia tenik.
Iha biban ne’e, Prezidente Autoridade RAEOA, Arsénio Paixão Bano, agradese ba embaixadór Indonézia iha Timor-Leste, tanba hili Oé-Cusse, ba implementasaun feira edukasaun hafoin realiza iha nasionál.
“Ami sente orgullu, oras ne’e daudaun Oé-Cusse sai diskusaun boot ba futuru sai hanesan ponte importante ba relasaun nasaun rua nian, interasaun Oé-Cusse ho Indonézia, espesialmente ho provínsia NTT,” nia orgullu.
“Ha’u hanoin, estudante sira iha Oé-Cusse, liuliu sekundáriu sira iha posibilidade boot atu kontinua sira-nia estudu, tán ne’e insiativa di’ak, atu iha futuru rekursu umanu iha Oé-Cusse bele forte liután,” nia espera.
Entretantu, universidade 15 mai hosi Indonézia hanesan; universidade Gorontalo, Institutu Pariwisata Trisakti, universidade 17 Agostu 1945 Jakarta, universidade Nusa Cendana Kupang, Unika Admajaya Jakarta.
Nune’e mós universidade Katolik Widia Mandira Kupang, universidade Islam Internasional Indonézia, Kristen Indonesia, universidade Timor, universidade Públiku Jakarta, Universidade Públiku Padang, universidade Públiku Surabaya, universidade Pertamina, President University, no universidade Padjajaran Bandung.
Notísia relevante: KBRI koordena Autoridade RAEOA, hakarak realiza feira edukasaun iha Oé-Cusse
Jornalista : Abílio Elo Nini
Editór : Evaristo Soares Martins
