OÉ-CUSSE 10 fevereiru 2023 (TATOLI) – Xefe Delegasaun hosi Embaixada Repúblika Indonézia (KBRI, sigla indonézia) iha Timor-Leste, Phil Ikhfan Haris, ne’ebé trata asuntu Edukasaun no Kultura Attache, informa, KBRI ajenda ona fulan-maiu sei realiza feira kona-bá edukasaun nian iha Rejiaun Administrativa Espesiál Oé-Cusse Ambeno (RAEOA).
Tán ne’e, iha kinta semana ne’e ekipa KBRI hala’o koordenasaun ba Autoridade RAEOA kona-bá planu preparasaun ba implementasaun feira nasionál ne’e iha Oé-Cusse.
“Ami hosi KBRI iha Timor-Leste, mai vizita Oé-Cusse no hasoru malu rezidente Autoridade, primeiru atu informa ba autoridade sira katak, kada tinan KBRI realiza feira edukasaun, entaun tinan ne’e mós ita sei realiza, ami deside ona katak sei realiza ba fatin rua, ida iha Oé-Cusse ida iha Dili,” Phil Ikhfan Haris, informa ba jornalista sira iha Oé-Cusse, kinta ne’e.
Nia hatutan, atividade feira ne’e, KBRI ajenda ona sei akontese iha fulan-maiu, no iha Dili sei akontese iha agostu tinan ne’e.
“Iha atividade barak mak ami diskute kona-bá feira ne’e, maibé ami fokuliu no hakarak tebes KBRI atu realiza feira nasionál ne’e iha povu Oé-Cusse, tanba iha ámbitu ne’e ami sei hala’o mós enkontru espesiál ho autoridade RAEOA kona-bá pathnership meeting hodi ko’alia kona-bá setór edukasaun nian iha futuru kooperasaun,” nia katak
Nia informa, atividade feira ne’e, ajenda fiksa ona katak, fulan-maiu tenke realiza ona, tanba tuir KBRI nia haree presiza realiza iha inísiu fulan-maiu, tanba iha outubru sei realiza tán iha Dili.
Presidente Autoridade RAEOA Arsénio Paixão Bano, sente ho inisiativa hosi Embaixada Repúblika Indonézia nian.
“Ita-nia ekipa hosi Adjuntu Prezidente Autoridade ba Asuntu Sosiál no Sekretária Rejionál ba Asuntu Edukasaun, sira sei ba diskute atu haree detalla kona-bá feira ne’e no mós haree setór labarik sira, atu prepara ita-nia kondisaun atu realiza atividade ne’e,” nia orguulu.
Jornalista: Abílio Elo Nini
Editór: Evaristo Soares Martins
