DILI, 27 jullu 2023 (TATOLI)–Primeiru-Ministru (PM), Kay Rala Xanana Gusmão, konsidera Timor-Leste laiha nesesidade hodi hasa’e folin sasán.
“Iha Timor laiha nesesidade ida-ne’e tanba ita iha reseita petróleu, ita-nia prinsípiu maka reseita petróleu ne’e povu ninia terus mak ita manán buat ida-ne’e, ne’e duni labele estraga, labele uza arbiru, reseita iha tiha ona, ita hasa’e buat ne’ebé tuir lei dehan katak, ne’e bele hasa’e la’ós hasa’e arbiru de’it, la’ós ida kaer osan ne’e tau tiha iha banku. Ein prinsípiu ha’u la simu katak sasán folin sa’e,” Xanana hateten hafoin reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.
Notísia relevante : PR Horta husu Governu foun rezolve folin sasán
Xefe Governu dehan, iha mundu normalmente kuandu iha situasaun ne’ebé Governu hasa’e impostu hodi aumenta reseita domésika no halo buat seluk tan.
“Tanba ita la akompaña situasaun ekonomia iha mundu no akompaña karik iha Europa ne’ebá ema halo manifestasaun loron-loron. Ida-ne’e tanba funu iha Ukránia no problema oin-oin maibé Governu kuandu hasa’e impostu ho objetivu atu hetan reseita doméstika hodi ajuda halo buat ruma. Tanba ne’e ha’u dehan tiha ona katak ami sei haree hela atu altera tiha buat saida mak halo, katak ita labele uza osan arbiru, ita husu osan arbiru la gasta tan,” Xanana tenik.
Antes ne’e, Prezidente Repúblika, José Ramos Horta, preokupa mós ho sasán folin sa’e, maibé aseita ho folin masin-midar no bebida midar sa’e tanba bele lori impaktu ladi’ak ba saúde públika.
Jornalista : Antónia Gusmão
Editora : Julia Chatarina
