iklan

NASIONÁL, EKONOMIA, HEADLINE

PR Horta husu Governu foun rezolve folin sasán

PR Horta husu Governu foun rezolve folin sasán

Atividade iha Portu Tibar, tersa (20/06/2023). Imajen Tatoli/António Daciparu

DILI, 28 juñu 2023 (TATOLI)–Prezidente Repúblika (PR), José Ramos Horta, husu ba Governu foun atu rezolve folin sasán ne’ebé sa’e iha merkadu no loja sira, nune’e labele hatodan povu.

“Governu tenke analiza didi’ak tanba sá mak folin sasán sa’e, ha’u konkorda katak Timor-Leste tenke haree kestaun ida-ne’e didi’ak. Ita atu tama daudaun ona ba Asosiasaun Nasaun Sudeste Aziátiku (ASEAN, sigla inglés), ita-nia tarifa labele a’as liu fali ASEAN nian no liu fali akordu integradu ne’ebé ita halo iha Organizasaun Mundiál Komérsiu (OMK). Portantu buat sira ne’e haree didi’ak ho parseiru asosiasaun para labele konflitu fali ho ita-nia obrigasaun,” PR Horta hateten hafoin fila hosi vizita ofisiál iha Alemaña, iha Aeroportu internasionál Prezidente Nicolau Lobato, Comoro, kuarta ne’e.

Ba oin, Xefe Estadu husu buat ne’ebé Governu halo tenke tuir konformidade inklui roteiru katak regra no tarifa impostu ajustadu ho situasaun atuál.

“Ha’u sei haree lai, ha’u lakohi interfere buat ne’ebé Governu nian maibé importante maka ho krize mundiál, ekonómika finanseira hahú ho pandemia COVID-19 no funu iha Ukraina, halo sasán folin sa’e maka’as tebes. Molok pandemia kontentór ida mai hosi Xina ho folin $4.000, depois sa’e ba $13.000. Ita-nia portu karun tebes tanba kontentór rai iha ne’ebá demora ho ida-ne’e kustu ne’e ba konsumidór,” nia akresenta.

Notísia relevante : PN aprova OJE 2023 hasa’e taxa impostu seletivu ba konsumu nian

Xefe Estadu preokupa tanba loloos Portu Tibar ho ekipamentu modernu, folin ba kontentór sira mós tun maibé kontráriu fali.

“Portu Tibar foun atu movimenta kontentór barak liu lojikamente folin atu tun, em vez de atu tun maibé sa’e fali, ne’e maka konfuzaun iha ita-nia rasosinu. Ha’u hanoin maka situasaun ekonómikamente defísil, ita labele povu ne’ebé ki’ak, funsionáriu, profesór ho vensimentu kiik loos halo defísil liután ho aumenta impostu ba produtu balun,” nia tenik.

Iha Sorin seluk, Horta konkorda ho Governu hasa’e taxa ba produtu asukarada hanesan masin-midar no produtu sira seluk hanesan alkoólika no tabaku tanba estraga ema-nia saúde.

“Tanba ne’e ha’u apela ba populasaun hotu katak han no hemu menus masin-midar, tanba problema diabete ne’e sei sai pandemia iha Timor-Leste. Diabetes ne’e sai ona pandemia ida iha Xina, Índia no rai seluk,” PR fó hanoin.

Horta prefere negosiante sira ne’ebé halo dosi baibain uza masin-midar bele troka ho bani-been tanba ne’e bele uza produtu lokál no saudável.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!